സൂപ്പര്‍ഹിറ്റ് ചിത്രങ്ങള്‍ ഒരുക്കി തിയേറ്ററുകള്‍ ഇളക്കി മറിച്ച തിരക്കഥാകൃത്താണ് ഡെന്നീസ് ജോസഫ്. മലയാള സിനിമയില്‍ മമ്മൂട്ടിയുടെ ശക്തമായ രണ്ടാം വരവ് സമ്മാനിച്ച ചിത്രമാണ് ഡെന്നീസ് ജോസഫ് തിരക്കഥ ഒരുക്കിയ ജോഷി ചിത്രം “ന്യൂഡല്‍ഹി”. മമ്മൂട്ടി-ജോഷി ചിത്രങ്ങള്‍ കനത്ത പരാജയത്തിലേക്ക് പോയിക്കൊണ്ടിരുന്ന സമയത്താണ് ന്യൂഡല്‍ഹി വന്‍ ഹിറ്റായത്.
ചിത്രം കണ്ട് ഇഷ്ടപ്പെട്ട് രജനികാന്ത് നേരിട്ടെത്തി ഡെന്നീസിനോട് സിനിമ ഹിന്ദി റീമേക്ക് ചെയ്യണമെന്ന് ആവശ്യപ്പെട്ടിരുന്നു. എന്നാല്‍ അത് സംഭവിച്ചില്ല. ഇതിന് പിന്നിലെ കഥ ഡെന്നീസ് തന്നെ അഭിമുഖങ്ങളില്‍ പങ്കുവച്ചിരുന്നു.
മദിരാശിയിലെ സഫയര്‍ തിയേറ്ററില്‍ നൂറു ദിവസം ന്യൂഡല്‍ഹി റഗുലര്‍ ഷോ കളിക്കുന്നതിനിടെ മറ്റൊരു ചിത്രത്തിന്റെ തിരക്കഥയുമായി താന്‍ അവിടെ ഉണ്ടായിരുന്നു. അന്ന് തന്നെ കാണാന്‍ ഒരു വിഐപി എത്തിയിട്ടുണ്ടെന്ന് റിസപ്ഷനില്‍ നിന്നും കോള്‍ വന്നു. വാതില്‍ തുറന്നപ്പോള്‍ ഞെട്ടിപ്പോയി. രജനികാന്ത് ആണ് കാണാന്‍ വന്നത്.
ന്യൂഡല്‍ഹിയുടെ ഹിന്ദി റീമേക്കിനുള്ള അവകാശത്തിനായാണ് രജനികാന്ത് വന്നത്. ചിത്രത്തിന്റെ ഹിന്ദി റീമേക്കില്‍ അദ്ദേഹത്തിന് ഹീറോ ആയി അഭിനയിക്കണം. എന്നാല്‍ അദ്ദേഹത്തോട് നല്ല വാക്ക് പറഞ്ഞ് പിരിയേണ്ടി വന്നു. കാരണം, അപ്പോഴേക്കും ചിത്രത്തിന്റെ കന്നഡ, തെലുഗ്, ഹിന്ദി പതിപ്പുകളുടെ റീമേക്ക് അവകാശം കൊടുത്തു കഴിഞ്ഞിരുന്നു എന്നാണ് ഡെന്നീസ് പറഞ്ഞത്.
സംവിധായകന്‍ മണിരത്നവും ന്യൂഡല്‍ഹിയെ പ്രശംസിച്ചതിനെ കുറിച്ചും ഡെന്നീസ് പറയുന്നു. ഇന്ത്യയിലെ വാണിജ്യ സിനിമകളില്‍ മണിരത്നത്തിന് ഏറ്റവും ഇഷ്ടപ്പെട്ട തിരക്കഥ ഷോലെയുടേതാണ്. അതുകഴിഞ്ഞാല്‍ പിന്നെ ന്യൂഡല്‍ഹിയാണ് എന്ന് അദ്ദേഹം പറഞ്ഞതായും ഡെന്നീസ് വ്യക്തമാക്കി.