റാം പോതിനേനിയുടെ പുതിയ ചിത്രത്തിലെ ഐറ്റം സോംഗ് വിവാദത്തില്‍. തെലങ്കാന മുന്‍ മുഖ്യമന്ത്രി കെ ചന്ദ്രശേഖര്‍ റാവുവിന്റെ ഒരു വാചകം പാട്ടില്‍ ഉപയോഗിച്ചുവെന്ന ആരോപണമാണ് ഉയര്‍ന്നു വന്നിരിക്കുന്നത്. പുരി ജഗന്നാഥിന്റെ സംവിധാനത്തില്‍ ഒരുങ്ങുന്ന ‘ഡബിള്‍ ഐ സ്മാര്‍ട്ട്’ എന്ന ചിത്രത്തിലെ ‘മാര്‍ മുന്‍ത ചോഡ് ചിന്ത’ എന്ന ഗാനമാണ് വിവാദത്തിലായിരിക്കുന്നത്.
സിനിമയിലെ ഐറ്റം സോംഗില്‍ അശ്ലീല പ്രയോഗമെന്ന രീതിയില്‍ മുന്‍ മുഖ്യമന്ത്രി പറഞ്ഞ വാചകം ഉപയോഗിച്ചു എന്നാണ് പോലീസില്‍ നല്‍കിയ പരാതി പറയുന്നത്.’എം ചെന്ദം അന്തവ് മാരി’ എന്ന വാചകം അശ്ലീലമാക്കി ഉപയോഗിച്ചു എന്ന് ആരോപിച്ച് മുതിര്‍ന്ന ബിആര്‍എസ് (ഭാരതീയ രാഷ്ട്ര സമിതി) നേതാവ് രജിത റെഡ്ഡിയാണ് സംവിധായകനും സിനിമയുടെ ടീമിനും എതിരെ പരാതി നല്‍കിയിരിക്കുന്നത്.
ജൂലൈ 16ന് ആയിരുന്നു ഗാനം പുറത്തിറങ്ങുയത്. ബോളിവുഡ് നടി കാവ്യ ഥാപ്പര്‍ ആണ് റാം പോതിനെനിക്കൊപ്പം ഗാനത്തില്‍ പ്രത്യക്ഷപ്പെട്ടത്. പുരി കണക്ട്സിന്റെ ബാനറില്‍ പുരി ജഗന്നാഥും ചാര്‍മി കൗറും ചേര്‍ന്നാണ് ഡബിള്‍ ഐസ്മാര്‍ട്ട് നിര്‍മ്മിക്കുന്നത്. സഞ്ജയ് ദത്തും ചിത്രത്തില്‍ അഭിനയിക്കുന്നുണ്ട്.
2019ല്‍ പുറത്തിറങ്ങിയ ‘ഐ സ്മാര്‍ട്ട് ശങ്കര്‍’ എന്ന ചിത്രത്തിന്റെ രണ്ടാം ഭാഗമാണ് ഡബിള്‍ ഐ സ്മാര്‍ട്ട്. രണ്ടാം ഭാഗം ഓഗസ്റ്റ് 15ന് ആണ് റിലീസ് ചെയ്യുന്നത്. സയാജി ഷിന്‍ഡെ, ബാനി ജെ, അലി, മകരന്ദ് ദേശ്പാണ്ഡെ, ഉത്തേജ് എന്നിവരാണ് ചിത്രത്തില്‍ പ്രധാന വേഷങ്ങളില്‍ എത്തുന്നത്. ഐ സ്മാര്‍ട്ട് ശങ്കര്‍ ബോക്‌സ് ഓഫീസില്‍ ഹിറ്റ് ആയിരുന്നു.