പൃഥ്വിരാജിന്റെ ബിഗ് ബജറ്റ് ചിത്രത്തിന് സംഗീതമൊരുക്കാൻ പ്രമുഖ സംഗീത സംവിധായകൻ. പൃഥ്വിരാജിനെ നായകനാക്കി എസ് മഹേഷ് ഒരുക്കുന്ന ബിഗ് ബജറ്റ് ചിത്രമാണ് കാളിയൻ. ചിത്രത്തിന് വേണ്ടി സംഗീതമൊരുക്കുന്നത് ‘കെജിഎഫ്’ സംഗീത സംവിധായനായ രവി ബസ്രുറാണ്. ‘കെജിഎഫ്’ രണ്ട് ഭാഗത്തിനും സംഗീതമൊരുക്കിയത് രവി ബസ്രൂറാണ്. രവി ബസ്രൂറിനെ കാളിയനിലേക്ക് സ്വാഗതം ചെയ്തുകൊണ്ട് പൃഥ്വിരാജാണ് ഫോട്ടോ സോഷ്യൽ മീഡിയയിലൂടെ പങ്കുവെച്ചിരിക്കുന്നത്.
വേണാടിന്റെ ചരിത്ര നായകനായിരുന്ന കുഞ്ചിറക്കോട്ട് ‘കാളിയനാ’യി എത്തുന്ന ചിത്രമാണ് ഇത്. നവാഗതനായ എസ് മഹേഷ് സംവിധാനം ചെയ്യുന്ന ചിത്രത്തിന്റെ തിരക്കഥ ഒരുക്കിയിരിക്കുന്നത് ബി ടി അനില്‍ കുമാര്‍ ആണ്. കേരളത്തിലെ തെക്കൻ നാടോടിക്കഥകളെ ആസ്പദമാക്കിയുള്ള ആദ്യ ചിത്രമാണിത്.
വേണാട് രാജ്യത്തിന്റെ പടനായകൻ ഇരവിക്കുട്ടി പിള്ളയുടെ വിശ്വസ്തനും പോരാളിയുമായ ധീരന്റെ വേഷമാണ് ചിത്രത്തിൽ പൃഥ്വിരാജ് ചെയ്യുന്നത്. 1700കളിലെ വേണാട്ടിൽ നിന്നുള്ള ഉഗ്ര യോദ്ധാക്കളുടെ കഥയാണ് ‘കാളിയൻ’ പറയുന്നത്. “കാളിയൻ ഒരു ഇതിഹാസ ത്രില്ലറായാണ് വിഭാവനം ചെയ്തിരിക്കുന്നത്.
ഇരവിക്കുട്ടി പിള്ളയുടെ വീരഗാഥകൾ തെക്കൻ പാട്ടുകളിൽ വാഴ്ത്തപ്പെട്ടിട്ടുണ്ട്. പതിനേഴാം നൂറ്റാണ്ടിലെ വേണാട് സാമ്രാജ്യത്തിന്റെ പശ്ചാത്തലത്തിലുള്ള കഥകളിലൊന്നാണിതെന്നും,” സംവിധായകൻ മഹേഷ് മുൻപ് ഒരഭിമുഖത്തിൽ വെളിപ്പെടുത്തിയിരുന്നു.