‘കെജിഎഫ്’ എന്ന ബ്രഹ്‌മാണ്ഡ ഹിറ്റിന് ശേഷം യാഷ് ഗീതു മോഹന്‍ദാസിന്റെ ചിത്രത്തില്‍ നായകനാകും എന്ന വാര്‍ത്തകള്‍ അടുത്തിടെ പ്രചരിച്ചിരുന്നു. യഷിന്റെ 19-ാമത്തെ ചിത്രം ഗീതു മോഹന്‍ദാസിന്റെ സംവിധാനത്തില്‍ ആയിരിക്കുമെന്ന് പിങ്കവില്ല റിപ്പോര്‍ട്ട് ചെയ്തിരുന്നു.
ഈ വാര്‍ത്ത സ്ഥിരീകരിച്ച് സന്തോഷം പങ്കുവച്ചിരിക്കുകയാണ് സംവിധായികയുടെ അടുത്ത സുഹൃത്തും നടിയുമായ റിമ കല്ലിങ്കല്‍. റിമയുടെ ഇന്‍സ്റ്റഗ്രാം സ്റ്റോറിയാണ് വൈറലായിരിക്കുന്നത്. ഒരു ആരാധകന് ടീം യാഷ് നല്‍കിയ മറുപടിയുടെ സ്‌ക്രീന്‍ ഷോട്ട് പങ്കുവച്ചാണ് ഗീതുവിന് ആശംസകളുമായി റിമ എത്തിയത്.
രാജീവ് രവിയായിരിക്കും ചിത്രത്തിന് ഛായാഗ്രഹണം നിര്‍വ്വഹിക്കുകയെന്നാണ് വിവരം. യാഷും ഗീതു മോഹന്‍ദാസും കഴിഞ്ഞ ഒരു വര്‍ഷമായി ഒന്നിച്ച് പ്രവര്‍ത്തിക്കുന്നതിനെ സംബന്ധിച്ച് ചര്‍ച്ച ചെയ്യുകയാണ്. ഗീതു അവതരിപ്പിച്ച ആശയത്തില്‍ യാഷ് തൃപ്തനാണ് എന്നായിരുന്നു പിങ്ക്‌വില്ല നേരത്തെ റിപ്പോര്‍ട്ട് ചെയ്തത്.
അതേസമയം, നേരത്തെ യാഷിന്റെ അടുത്ത പ്രോജക്ടില്‍ താരം തന്നെ സംവിധായകനാകുമെന്ന് കന്നട സിനിമ രംഗത്ത് ഊഹാപോഹങ്ങള്‍ ഉയരുന്നിരുന്നു. എന്നാല്‍ ഔദ്യോഗിക സ്ഥിരീകരണമില്ല. ‘കെജിഎഫ് ചാപ്റ്റര്‍ 3’ സിനിമയ്ക്കായാണ് പ്രേക്ഷകര്‍ ഇപ്പോള്‍ കാത്തിരിക്കുന്നത്.