കഴിഞ്ഞ വര്‍ഷം ഇറങ്ങിയ ഇന്ത്യന്‍ സിനിമകളില്‍ ഏറ്റവും വലിയ ഹിറ്റുകളുടെ പട്ടികയില്‍ ഇടം നേടിയ ചിത്രമാണ് റിഷഭ് ഷെട്ടി സംവിധാനം ചെയ്ത് അഭിനയിച്ച കാന്താര. ചിത്രത്തിന്റെ രണ്ടാം ഭാഗത്തിന്റെ സാധ്യതയെക്കുറിച്ച് ചിത്രത്തിന്റെ നിര്‍മ്മാതാവ് വിജയ് കിരഗണ്ഡൂര്‍ നേരത്തെ സൂചിപ്പിച്ചിരുന്നു. അതേസമയം ചിത്രത്തിന്റെ സീക്വല്‍ ആണോ പ്രീക്വല്‍ ആണോ പിന്നാലെ എത്തുക എന്നത് ഇപ്പോള്‍ പറയാനാകില്ലെന്നും സംവിധായകന്‍ ഋഷഭ് ഷെട്ടിയുമായി ആലോചിച്ച് മാത്രമാണ് തീരുമാനമെടുക്കുകയെന്നുമാണ് കഴിഞ്ഞ ഡിസംബറില്‍ അദ്ദേഹം പറഞ്ഞത്.
ഇപ്പോഴിതാ സിനിമയുടെ പ്രീക്വലുമായി ബന്ധപ്പെട്ടുള്ള വിജയ് കിരഗണ്ഡൂരിന്റെ വാക്കുകള്‍ ശ്രദ്ധേയമാവുകയാണ്. കാന്താരയില്‍ പറയുന്ന പഞ്ചുരുളി ദൈവ എന്ന മിത്തിനെ അടിസ്ഥാനമാക്കി പ്രീക്വല്‍ ഒരുങ്ങുന്നതായാണ് നിര്‍മ്മാതാവ് വിജയ് കിരഗണ്ഡൂരിനെ ഉദ്ധരിച്ച് ഡെഡ്‌ലൈന്‍ റിപ്പോര്‍ട്ട് ചെയ്തിരിക്കുന്നത്.
ചിത്രത്തിന്റെ രചന റിഷഭ് ഷെട്ടി ആരംഭിച്ചു എന്നും സഹ രചയിതാക്കള്‍ക്കൊപ്പം കഥയുമായി ബന്ധപ്പെട്ടുള്ള ഗവേഷണങ്ങള്‍ക്കായി അദ്ദേഹം വനത്തിലേക്ക് പോയിരിക്കുകയാണെന്നും വിജയ് കിരഗണ്ഡൂര്‍ പറഞ്ഞു.
ചിത്രീകരണത്തിന്റെ ഒരു ഘട്ടം മഴക്കാലത്ത് നടത്തേണ്ടതായതുകൊണ്ടാണ് ജൂണ്‍ വരെ കാത്തിരിക്കുന്നത്.
2024 ഏപ്രിലില്‍-മെയ് മാസത്തില്‍ ഒരു പാന്‍ ഇന്ത്യന്‍ റിലീസായി കാന്താര പ്രീക്വല്‍ ആലോചിക്കുന്നുവെന്നും പുതിയ ചില കഥാപാത്രങ്ങളും കൂടി അണിചേരുമെന്നും വിജയ് കിരഗണ്ഡൂര്‍ കൂട്ടിച്ചേര്‍ത്തു.