നടന്‍ റിയാസ് ഖാന്റെ മകന് വിവാഹിതനാകുന്നു. മൂത്ത മകന് ഷാരിഖ് ഹസന്റെ ഹല്‍ദി ചടങ്ങുകള്‍ ആഘോഷമാക്കുന്ന റിയാസിന്റെയും ഭാര്യ ഉമയുടെയും വീഡിയോയാണ് വൈറലാകുന്നത്. ‘അടിച്ചു കേറി വാ’ എന്ന ഹിറ്റ് ഡയലോഗ് ഹൈലൈറ്റ് ചെയ്ത റാപ്പ് ഗാനത്തിന്റെ പശ്ചാത്തലത്തിലാണ് ഹല്‍ദി വീഡിയോ പുറത്തിറക്കിയിരിക്കുന്നത്.
മരിയ ജെന്നിഫറാണ് ഷാരിഖിന്റെ വധു. ഏറെക്കാലമായി ഷാരിഖും മരിയയും പ്രണയത്തിലായിരുന്നു. നടനും തമിഴ് ബിഗ് ബോസ് താരവുമായ ഷാരിഖ് സിനിമാ രംഗത്തേക്കും കടക്കുകയാണ്. നിലവില്‍ ലോകേഷ് കുമാര്‍ സംവിധാനം ചെയ്യുന്ന ‘റിസോര്‍ട്ട്’ എന്ന ചിത്രത്തില്‍ അഭിനയിച്ചു കൊണ്ടിരിക്കുകയാണ് ഷാരിഖ്.
മകന്റെ വിവാഹ വാര്‍ത്ത പ്രേക്ഷകരെ ആദ്യം അറിയിക്കുന്നത് അമ്മ ഉമ റിയാസ് ആണ്. ”അവസാനം എന്റെ ബേബി മാലാഖയെ പോലെ മനോഹരിയായ പെണ്‍കുട്ടിയെ വിവാഹം ചെയ്യാന്‍ പോകുന്നു. ഓഗസ്റ്റ് 8ന് ആണ് വിവാഹം” എന്നാണ് ഷാരിഖിന്റെയും മരിയയുടെയും ചിത്രം പങ്കുവച്ച് ഉമ സോഷ്യല്‍ മീഡിയയില്‍ കുറിച്ചത്.
1992ല്‍ ആയിരുന്നു റിയാസ് ഖാന്റെയും ഉമയുടെയും വിവാഹം കഴിഞ്ഞത്. മലയാളത്തിനൊപ്പം തമിഴ് സിനിമയിലും റിയാസ് ഖാന്‍ സജീവമായിരുന്നു. അങ്ങനെയാണ് തമിഴ് സംഗീത സംവിധായകന്‍ കമലേഷിന്റെയും നടി കമല കമലേഷിന്റെയും മകളായ ഉമയുമായി പ്രണയത്തിലായത്. ഷാരിഖിനെ കൂടാതെ സമര്‍ഥ് എന്ന മകനും ഇവര്‍ക്കുണ്ട്.
