ബിഗ് ബോസിലൂടെ ശ്രദ്ധ നേടിയ ഡോ. റോബിന്‍ രാധാകൃഷ്ണന്‍ നായകനും സംവിധായകനുമായ പുതിയ സിനിമ പ്രഖ്യാപിച്ചു. ‘രാവണയുദ്ധം’ എന്ന് പേരിട്ട ചിത്രത്തിന് തിരക്കഥ ഒരുക്കുന്നതും റോബിന്‍ തന്നെയാണ്. റോബിന്റെതായി പുറത്തു വരാനിരിക്കുന്ന രണ്ടാമത്തെ ചിത്രമാകും ഇത്.
വേണു ശശിധരന്‍ ലേഖ ആണ് ചിത്രത്തിന് ഛായാഗ്രഹണം നിര്‍വ്വഹിക്കുന്നത്. ശങ്കര്‍ ശര്‍മ്മ സംഗീത സംവിധാനം നിര്‍വ്വഹിക്കും. ഡോ. റോബിന്‍ രാധാകൃഷ്ണന്‍ ഫിലിം പ്രൊഡക്ഷന്‍സിന്റെ ബാനറില്‍ റോബിന്‍ തന്നെയാണ് ചിത്രം നിര്‍മ്മിക്കുന്നത്.
മോഡലും നടിയും റോബിന്റെ ഭാര്യയുമായ ആരതി പൊടിയാകും പുതിയ സിനിമയില്‍ നായികാ വേഷത്തില്‍ എത്തുകയെന്നാണ് റിപ്പോര്‍ട്ടുകള്‍. നവംബറില്‍ സിനിമയുടെ ചിത്രീകരണം ആരംഭിക്കുമെന്നാണ് വിവരം. എന്നാല്‍ പോസ്റ്ററിന് താഴെ ട്രോളുകളാണ് വരുന്നത്.
‘സന്തോഷ് പണ്ഡിറ്റിന് ഒരു എതിരാളി’, ‘വാച്ച് കച്ചവടം ആണോ? രണ്ട് കൈയ്യിലും വാച്ച് കെട്ടിയിരിക്കുന്നു?’, ‘മലയാളം ബോക്‌സോഫീസിന് ആര്‍ഐപി’, ‘ഈ അരിശം അല്ലാണ്ട് ഒരു എക്‌സ്പ്രഷന്‍ ആ മുഖത്ത് എന്താണ് വരാത്തത്’ എന്നൊക്കെയാണ് ചില കമന്റുകള്‍.
നേരത്തെ ലോകേഷ് കനകരാജിന് നന്ദി അറിയിച്ചുകൊണ്ട് റോബിന്റെ പങ്കുവച്ച പോസ്റ്റ് വലിയ ശ്രദ്ധ നേടിയിരുന്നു. പിന്നാലെ പുതിയ സിനിമയുടെ പ്രഖ്യാപനം ലോകേഷ് നടത്തുമെന്ന് അഭ്യൂഹങ്ങളും പരന്നിരുന്നു. എന്നാല്‍ പുതിയ സിനിമയുടെ പ്രഖ്യാപനം റോബിന്‍ തന്നെയാണ് നടത്തിയിരിക്കുന്നത്.