പ്രഭാസിന്റെ “സാഹോ” ഏറ്റെടുത്ത് ആരാധകര്‍. മികച്ച പ്രതികരണങ്ങളുമായി തീയേറ്ററുകളില്‍ വിജയക്കുതിപ്പ് തുടരുകയാണ് ചിത്രം. 68 കോടി രൂപയാണ് ആദ്യ ദിനത്തില്‍ സാഹോ നേടിയിരിക്കുന്നത്. ഇതോടെ “അവഞ്ചേര്‍സി”ന്റെയും “തഗ്‌സ് ഓഫ് ഹിന്ദുസ്ഥാനി”ന്റെയും ആദ്യ ദിന കളക്ഷന്‍ റെക്കോര്‍ഡുകളാണ് സാഹോ തകര്‍ത്തിരിക്കുന്നത്. ഗംഭീര തുടക്കം തന്നെയാണ് ചിത്രം കരസ്ഥമാക്കിയിരിക്കുന്നത്.
ബോളിവുഡ് താരം ശ്രദ്ധ കപൂര്‍ നായികയായെത്തിയ ചിത്രം ഹിന്ദി, തെലുങ്ക്, തമിഴ്, മലയാളം എന്നീ ഭാഷകളിലായാണ് റിലീസ് ചെയ്തത്. സുജീത്ത് സംവിധാനം ചെയ്ത ചിത്രംയുവി ക്രിയേഷന്‍സിന്റെ ബാനറിലാണ് നിര്‍മ്മിച്ചിരിക്കുന്നത്. പ്രശസ്ത ഹോളിവുഡ് ആക്ഷന്‍ കോ-ഓര്‍ഡിനേറ്റര്‍ കെന്നി ബേറ്റ്‌സാണ് ചിത്രത്തിന്റെ ആക്ഷന്‍ കൊറിയോഗ്രാഫര്‍. ബാഹുബലിയുടെ ആര്‍ട്ട് ഡയറക്ടറായിരുന്ന സാബു സിറിലാണ് കലാസംവിധായകന്‍.
ഗിബ്രാന്‍ പശ്ചാത്തലസംഗീതം നിര്‍വഹിക്കുന്ന ചിത്രത്തിന്റെ ഛായാഗ്രഹണം ആര്‍. മഥിയും എഡിറ്റിങ് ശ്രീകര്‍ പ്രസാദുമാണ് നിര്‍വഹിക്കുന്നത്. ജാക്കി ഷ്രോഫ്, നീല്‍ നിതിന്‍ മുകേഷ്, മന്ദിര ബേദി, ചങ്കി പാണ്ഡേ, ലാല്‍, മഹേഷ് മഞ്ജറേക്കര്‍, അരുണ്‍ വിജയ്, മുരളി ശര്‍മ തുടങ്ങിയവരും ചിത്രത്തില്‍ വേഷമിടുന്നു.