ഈ ക്രിസ്മസിന് തിയേറ്ററില്‍ ഏറ്റുമുട്ടാന്‍ ഒരുങ്ങുന്നത് വമ്പന്‍ ചിത്രങ്ങളാണ്. മലയാളത്തില്‍ നിന്നും മോഹന്‍ലാലിന്റെ ‘നേര്’ ആണ് ക്രിസ്മസ് റിലീസ് ആയി ആദ്യം എത്തുന്ന ചിത്രം. ഡിസംബര്‍ 21ന് തന്നെ ഷാരൂഖ് ഖാന്‍ ചിത്രം ‘ഡങ്കി’യും തിയേറ്ററുകളിലെത്തും. ഇതിന് പിന്നാലെ ഡിസംബര്‍ 22ന് ആണ് ‘സലാര്‍’ റിലീസ് ചെയ്യുക.
സലാറിനൊപ്പം തന്നെ ഹോളിവുഡ് ചിത്രം ‘അക്വാമാനും’ തിയേറ്ററിലെത്തും. എന്നാല്‍ കേരളത്തില്‍ റെക്കോര്‍ഡ് ഇടാന്‍ പോകുന്നത് സലാര്‍ ആകും എന്നാണ് റിപ്പോര്‍ട്ടുകള്‍. കേരളത്തിലെ അഡ്വാന്‍സ് ടിക്കറ്റ് ബുക്കിംഗില്‍ വലിയ സ്വീകാര്യതയാണ് സലാറിന് ലഭിക്കുന്നത്.
കേരളത്തില്‍ സലാര്‍ ഒരു കോടിയില്‍ അധികം ടിക്കറ്റ് ബുക്കിംഗില്‍ നിന്നും നേടിക്കഴിഞ്ഞു എന്നാണ് ബോക്‌സ് ഓഫീസ് റിപ്പോര്‍ട്ട്. ഷാരൂഖിന്റെ ഡങ്കിക്ക് എട്ട് ലക്ഷമാണ് കളക്ഷന്‍ മുന്‍കൂറായി നേടാനായത്. ഇതു കണക്കിലെടുത്താല്‍ ഇന്ത്യയിലെ പല കളക്ഷന്‍ റെക്കോര്‍ഡുകളും സലാര്‍ തിരുത്തുമെന്നാണ് പ്രതീക്ഷ.
അങ്ങനെയെങ്കില്‍ ‘ജവാന്‍’, ‘പഠാന്‍’ എന്നീ ചിത്രങ്ങളുടെ റെക്കോര്‍ഡിനൊപ്പം ഡങ്കിക്ക് എത്താന്‍ സാധിക്കില്ലെന്നും റിപ്പോര്‍ട്ടുകളുണ്ട്. ഈ വര്‍ഷത്തെ 1000 കോടി ചിത്രങ്ങളാണ് ഷാരൂഖിന്റെ ജവാനും പഠാനും. അതേസമയം, സലാറില്‍ പ്രഭാസിനൊപ്പം പൃഥ്വിരാജും കേന്ദ്ര കഥാപാത്രമായി എത്തുന്നു എന്നതാണ് മലയാളി പ്രേക്ഷകരെ ആകര്‍ഷിക്കാനുള്ള ഘടകം.
പ്രശാന്ത് നീല്‍ ചിത്രത്തില്‍ വരദരാജ മന്നാര്‍ എന്ന കഥാപാത്രമായാണ് പൃഥ്വിരാജ് വേഷമിടുന്നത്. താരത്തിന്റെ ലുക്കും കഥാപാത്രവും ചിത്രത്തിന്റെ ടീസറും ഗാനവും എത്തിയപ്പോഴേ ശ്രദ്ധ നേടിയിരുന്നു. ഹോംബാലെ ഫിലിംസിന്റെ ബാനറില്‍ വിജയ് കിരഗണ്ടൂര്‍ ആണ് ചിത്രം നിര്‍മ്മിക്കുന്നത്.