ബേസില്‍ ജോസഫ് നായകനായ ‘പൊന്‍മാന്‍’ മികച്ച അഭിപ്രായങ്ങള്‍ നേടി തിയേറ്ററുകളില്‍ മുന്നേറുകയാണ്. നിരവധി പേരാണ് ചിത്രത്തിന് പ്രശംസകളും അഭിനന്ദനങ്ങളുമായി രംഗത്തെത്തുന്നത്. മലയാളി ക്രിക്കറ്റ് താരമായ സഞ്ജു സാംസണ്‍ സിനിമ കാണാനുള്ള ആകാംഷ പങ്കുവച്ച് കുറിച്ച സ്റ്റോറിയാണ് സോഷ്യല്‍ മീഡിയയില്‍ ഇപ്പോള്‍ ശ്രദ്ധ നേടിക്കൊണ്ടിരിക്കുന്നത്.
പൊന്‍മാന്‍ ഉടന്‍ കാണാന്‍ കഴിയുമെന്ന ആകാംക്ഷയിലാണെന്നും ബേസിലിന്റെ ചിത്രങ്ങള്‍ കാണാതിരിക്കാന്‍ കഴിയില്ലെന്നും സഞ്ജു സ്റ്റോറിയില്‍ പങ്കുവെച്ചു. അതേസമയം, മഞ്ജു വാര്യര്‍, മാല പാര്‍വതി, ഡിജോ ജോസ് ആന്റണി, ജോഫിന്‍ ടി ചാക്കോ, ജിയോ ബേബി, അരുണ്‍ ഗോപി, ടിനു പാപ്പച്ചന്‍ തുടങ്ങി നിരവധിപേര്‍ സിനിമയെ കുറിച്ച് മികച്ച അഭിപ്രായങ്ങള്‍ പങ്കുവച്ചിരുന്നു.
അജിത് വിനായക ഫിലിംസിന്റെ ബാനറില്‍ വിനായക അജിത് നിര്‍മ്മിച്ച പൊന്‍മാന്‍ എന്ന ചിത്രം ജി. ആര്‍ ഇന്ദു ഗോപന്റെ നാലഞ്ചു ചെറുപ്പക്കാര്‍ എന്ന നോവലിനെ ആസ്പദമാക്കിയാണ് അണിയിച്ചൊരുക്കിയിരിക്കുന്നത്. ബേസില്‍ ജോസഫിനെ കൂടാതെ സജിന്‍ ഗോപു, ലിജോ മോള്‍ ജോസ്, ആനന്ദ് മന്മഥന്‍, ദീപക് പരമ്പോള്‍ എന്നിവരാണ് മറ്റ് പ്രധാന വേഷങ്ങള്‍ അവതരിപ്പിച്ചിരിക്കുന്നത്.
2003ന് ശേഷമുള്ള കാലഘട്ടത്തില്‍ കൊല്ലം ജില്ലയുടെ തീരദേശത്ത് നടന്ന ഒരു വിവാഹവും അതുമായി ബന്ധപ്പെട്ട് പറ്റിക്കപ്പെടുകയും ചെയ്ത അജേഷ് എന്ന ചെറുപ്പക്കാരന്റെ ജീവിതം സിനിമയായപ്പോള്‍ ഒരു റിയല്‍ ട്രൂ സ്റ്റോറി എന്ന നിലയില്‍ സിനിമയ്ക്ക് വലിയ സ്വീകാര്യതയാണ് ലഭിച്ചുകൊണ്ടിരിക്കുന്നത്.
