വൈറ്റില ജംഗ്ഷന്‍ വഴി ജോജു ജോര്‍ജ് സഞ്ചരിക്കില്ലെന്ന് നടന്‍ ഷറഫുദ്ദീന്‍. ജോജുവിനെ ട്രോളുന്ന വാക്കുകളാണ് ഇപ്പോള്‍ സോഷ്യല്‍ മീഡിയയില്‍ വൈറലാകുന്നത്. ജോജു ജോര്‍ജ്, ഷറഫുദ്ദീന്‍, നരേന്‍ എന്നിവര്‍ കേന്ദ്ര കഥാപാത്രങ്ങളാകുന്ന ‘അദൃശ്യം’ എന്ന സിനിമയുടെ പ്രമോഷനുമായി ബന്ധപ്പെട്ട് നടന്ന അഭിമുഖത്തിലാണ് നടന്‍ സംസാരിച്ചത്.
അഭിമുഖത്തിനിടെ ജോജുവിനെ കണ്ടില്ലെന്ന് അവതാരകന്‍ പറയുമ്പോള്‍ ”വൈറ്റില ജംഗ്ഷന്‍ വഴിയായതുകൊണ്ട് പുള്ളി വന്നില്ല” എന്നാണ് ഷറഫുദ്ദീന്‍ പറയുന്നത്. ”വന്നില്ലാന്ന് മാത്രമല്ല, വരൂല്ല” എന്ന് നടന്‍ നരേനും പറയുന്നുണ്ട്. കൊച്ചിയില്‍ നടന്ന യൂത്ത് കോണ്‍ഗ്രസ് സമരവും അതിനിടയിലേക്ക് ജോജുവും എത്തിയത് വിവാദമായിരുന്നു.
ഇന്ധന വില വര്‍ദ്ധനവിനെതിരെ യൂത്ത് കോണ്‍ഗ്രസ് നടത്തിയ സമരത്തെ ചോദ്യം ചെയ്ത ജോജുവിന്റെ കാര്‍ പ്രവര്‍ത്തകര്‍ തല്ലി തകര്‍ത്തിരുന്നു. കോണ്‍ഗ്രസ് പ്രവര്‍ത്തകര്‍ ജോജുവിന്റെ വീട്ടിലേക്ക് മാര്‍ച്ച് നടത്തുകയും, അനുമതിയില്ലാതെ റേസിംഗ് നടത്തിയെന്നും ആരോപിച്ചും താരത്തിനെതിരെ രംഗത്തെത്തിയിരുന്നു.
അതേസമയം, നവാഗതനായ സാക് ഹാരിസ് തിരക്കഥയും സംഭാഷണവും എഴുതി സംവിധാനം ചെയ്യുന്ന ചിത്രമാണ് അദൃശ്യം. ജുവിസ് പ്രൊഡക്ഷനും യു.എ.എന്‍ ഫിലിം ഹൗസ്, എഎഎ ആര്‍ പ്രൊഡക്ഷന്‍സ് എന്നിവര്‍ സംയുക്തമായി നിര്‍മിക്കുന്ന അദൃശ്യം നവംബര്‍ 18ന് ആണ് തിയേറ്ററിലെത്തുന്നത്.
കയല്‍ ആനന്ദി, പവിത്ര ലക്ഷ്മി , ആത്മീയ രാജന്‍, പ്രതാപ് പോത്തന്‍, ജോണ്‍ വിജയ്, മുനിഷ്‌കാന്ത്, സിനില്‍ സൈന്‍യുദീന്‍, വിനോദിനി, അഞ്ജലി റാവു, ബിന്ദു സഞ്ജീവ്, എന്നിവര്‍ ചിത്രത്തില്‍ മറ്റ് പ്രധാനകഥാപാത്രങ്ങളായി എത്തും. മലയാളത്തിനൊപ്പം തമിഴിലും ചിത്രം എത്തുന്നുണ്ട്.