വിമാനത്താവളത്തില്‍ തന്നെ പിന്തുടര്‍ന്ന് ശല്യം ചെയ്ത ആരാധകനോട് പ്രതികരിച്ച് നടിയും ഗായികയുമായ ശ്രുതി ഹാസന്‍. മുംബൈയില്‍ വിമാനത്താവളത്തിലെത്തിയ താരത്തെ ആരാധകന്‍ പിന്തുടര്‍ന്ന് ശല്യം ശല്യം ചെയ്യുകയായിരുന്നു.
തന്നെ പിന്തുടരുന്ന വ്യക്തിക്കെതിരെ അനിഷ്ടം പ്രകടിപ്പിക്കുന്ന താരത്തിന്റെ വീഡിയോയാണ് ശ്രദ്ധ നേടുന്നത്. വിമാനത്താവളത്തില്‍ വന്നിറങ്ങിയ ശ്രുതി ആദ്യം തന്നെ ഫോട്ടോ എടുക്കാന്‍ അനുവദിക്കുന്നുണ്ട്. എന്നാല്‍ ഫോട്ടോ എടുത്ത ശേഷവും ഇയാള്‍ ശ്രുതിയെ പിന്തുടരുകയായിരുന്നു.
ആരാണ് അയാളെന്ന് ശ്രുതി ഹാസന്‍ ഫൊട്ടോഗ്രാഫര്‍മാരോടും ചോദിക്കുന്നുണ്ട്. എന്തിനാണ് ഇവിടെ നില്‍ക്കുന്നതെന്ന് താരം ചോദിക്കുന്നത് വീഡിയോയില്‍ കേള്‍ക്കാം. കാറിനടുത്ത് എത്തിയപ്പോഴും അയാള്‍ നടിയുടെ പുറകെ തന്നെയുണ്ട്.
വീണ്ടും ശ്രുതിയോട് സെല്‍ഫി എടുക്കാന്‍ നിര്‍ബന്ധിക്കുകയും ചെയ്യുന്നുണ്ട്. എന്നാല്‍ തനിക്ക് താങ്കള്‍ ആരാണെന്ന് അറിയില്ല എന്ന് മാന്യമായി നടി വ്യക്തമാക്കുകയും ചെയ്യുന്നുണ്ട്. മറ്റ് ആരാധകരും നടിയെ പിന്തുണച്ച് രംഗത്ത് എത്തിയിട്ടുണ്ട്.