ഫെഫ്കയുടെ പുതിയ പ്രസിഡന്റായി സംവിധായകന്‍ സിബി മലയില്‍. ബി ഉണ്ണികൃഷ്ണനാണ് ജനറല്‍ സെക്രട്ടറി. കൊച്ചിയില്‍ നടന്ന ഫെഫ്കയുടെ വാര്‍ഷിക ജനറല്‍ കൗണ്‍സില്‍ യോഗത്തിലാണ് പുതിയ ഭാരവാഹികളെ തിരഞ്ഞെടുത്തത്. സോഹന്‍ സീനുലാല്‍ വര്‍ക്കിംഗ് സെക്രട്ടറിയും സതീഷ് ആര്‍.എച്ച് ട്രഷററുമായി തുടരും.
21 അംഗസംഘടനകളില്‍ നിന്നുള്ള 63 ജനറല്‍ കൗണ്‍സില്‍ അംഗങ്ങളാണ് ഭാരവാഹികളെ ഏകകണ്ഠമായി തിരഞ്ഞെടുത്തത്. ജി.എസ്.വിജയന്‍, എന്‍.എം.ബാദുഷ, ദേവി.എസ്, അനില്‍ ആറ്റുകാല്‍, ജാഫര്‍ കാഞ്ഞിരപ്പിള്ളി എന്നിവരാണ് വൈസ് പ്രസിഡന്റ്മാര്‍.
ജോയിന്റ് സെക്രട്ടറിമാരായി ഷിബു.ജി.സുശീലന്‍, അനീഷ് ജോസഫ്, നിമേഷ്.എം, ബെന്നി ആര്‍ട്ട് ലൈന്‍, പ്രദീപ് രംഗന്‍ എന്നിവരെ തിരഞ്ഞെടുത്തു. ഫെഫ്കയിലെ മുഴുവന്‍ അംഗങ്ങള്‍ക്കും സൗജന്യ ആരോഗ്യ ഇന്‍ഷുറന്‍സ് പദ്ധതി, ആസ്ഥാന മന്ദിര നിര്‍മ്മാണം, കൂടുതല്‍ മെച്ചപ്പെട്ട തൊഴില്‍ സാഹചര്യങ്ങള്‍ ഒരുക്കുക തുടങ്ങി ഒട്ടേറെ ലക്ഷ്യങ്ങളുമായാണ് ഫെഫ്ക പുതിയ വര്‍ഷപ്പിറവിയിലേക്ക് പ്രവേശിക്കുന്നത്.