അന്തരിച്ച സംവിധായകന്‍ സച്ചിയെക്കുറിച്ചുള്ള ഭാര്യ സിജിയുടെ അഭിമുഖം വൈറലാകുകയാണ്. സച്ചിയുമായുള്ള പ്രണയത്തെക്കുറിച്ചാണ് സിജി ബിഹൈന്‍ഡ് വുഡ്‌സുമായുള്ള അഭിമുഖത്തില്‍ മനസ്സുതുറന്നത്. പ്രണയം എല്ലാവര്‍ക്കും തോന്നും. അത് അസ്ഥിയില്‍ പിടിക്കാനായി എന്തെങ്കിലും കാരണം വേണമെന്നാണ് സച്ചി പറയാറുള്ളത്.
സച്ചിക്ക് വളരെ ശക്തമായ നിലപാടുകളുണ്ട്. ആര്‍ക്ക് വേണ്ടിയും അഭിപ്രായം മാറ്റാത്തയാളാണ് ഞാന്‍. അങ്ങനെയുള്ള ഞങ്ങള്‍ക്ക് തീവ്രമായി പ്രണയിക്കാന്‍ കഴിഞ്ഞു. സച്ചിയുടെ ഈഗോയില്‍ നമുക്കൊന്നും ചെയ്യാനില്ല. സ്നേഹം കൊണ്ട് മാത്രമേ സച്ചിയെ മാനേജ് ചെയ്യാനാവൂ. സത്യസന്ധതയും മനുഷ്യത്വവും സച്ചിക്ക് കൂടുതലാണ്. ഒരു വാക്ക് പറഞ്ഞാല്‍ അത് നിലനിര്‍ത്തുന്നയാളാണ് ഞാന്‍. സിജി പറയുന്നു.
ഒരു ശ്വാസത്തിലൂടെ സച്ചിയെ എനിക്ക് മനസിലാവുമായിരുന്നു. സ്നേഹത്തിന്റെ കാര്യത്തില്‍ ഞങ്ങള്‍ അങ്ങോട്ടും ഇങ്ങോട്ടും തോല്‍പ്പിക്കാന്‍ മത്സരിച്ചവരാണ്. അതില്‍ നീയേ തോല്‍ക്കൂയെന്ന് പറയാറുണ്ടായിരുന്നു.
എഴുതാനിരുന്ന് കഴിഞ്ഞാല്‍ പെട്ടെന്ന് തീര്‍ക്കും. ആ സമയങ്ങളില്‍ മദ്യപിക്കുകയോ മാംസം കഴിക്കുകയോ പുകവലിക്കുകയോ ചെയ്യാറില്ല. മൂകാംബികയില്‍ റൂമെടുത്ത് എഴുതിത്തീര്‍ത്ത് സ്‌ക്രിപറ്റ് പൂജിച്ചാണ് തിരികെ വരുന്നതെന്നും സിജി അഭിമുഖത്തില്‍ പറഞ്ഞു.