നൈല്‍ ആന്‍ഡ് ബ്ലൂ ഹില്‍ മോഷന്‍ പിക്‌ചേഴ്‌സിന്റെ ബാനറില്‍ സ്വീറ്റി മരിയ ജോബി നിര്‍മ്മിക്കുന്ന “ജിബൂട്ടി” എന്ന ചിത്രത്തിന്റെ പൂജ ബോള്‍ഗാട്ടിയിലെ ഗ്രാന്റ് ഹയാത്ത് ഹോട്ടലില്‍ വച്ചു നടന്നു. ഉപ്പും മുളകും പരമ്പരയുടെ സംവിധായകന്‍ എസ്. ജെ. ജിനു ആണ് ചിത്രം സംവിധാനം ചെയ്യുന്നത്. ഇന്ത്യന്‍ സിനിമ ചരിത്രത്തില്‍ ആദ്യമായി ഒരു മലയാള സിനിമ ആഫ്രിക്കന്‍ രാജ്യമായ ജിബൂട്ടില്‍ ഷൂട്ട് ചെയ്യാന്‍ പോകുന്നു എന്ന പ്രത്യേകത ചിത്രത്തിനുണ്ട്. രാജ്യത്തിന്റെ പേരു തന്നെയാണ് സിനിമയ്ക്കും നല്കിയിരിക്കുന്നത്.
ജിനുവിന്റെ കഥയ്ക്ക് ഉപ്പും മുളകും തിരക്കഥാകൃത്ത് അഫ്സല്‍ കരുനാഗപ്പള്ളി തിരക്കഥ, സംഭാഷണം നിര്‍വഹിക്കുന്നു. അമിത് ചക്കാലക്കല്‍, ഗ്രിഗറി, ദിലീഷ് പോത്തന്‍, ശകുന്‍ ജസ്വാള്‍, രോഹിത് മഗ്ഗു, അലന്‍സിയര്‍, ഗീത, സുനില്‍ സുഖദ, ബിജു സോപാനം, വെട്ടുകിളി പ്രകാശ്, പൗളി വത്സന്‍,മാസ്റ്റര്‍ ഡാവിഞ്ചി,സ്മിനു സിജോ എന്നിവരോടൊപ്പം മലയാളത്തിലെ മറ്റു പ്രമുഖ താരങ്ങളും അഭിനയിക്കുന്നു.
Read more
ടി ഡി ശ്രീനിവാസ് ഛായാഗ്രഹണവും സംജിത് മുഹമ്മദ് എഡിറ്റിംഗും നിര്‍വഹിക്കുന്ന ചിത്രത്തില്‍ കൈതപ്രത്തിന്റെ വരികള്‍ക്ക് ദീപക്‌ദേവ് സംഗീതം പകരുന്നു. കേരളത്തിലും ആഫ്രിക്കയിലുമായി ജനുവരി അവസാനം ചിത്രത്തിന്റെ ഷൂട്ടിംഗ് തുടങ്ങും. ചിത്രത്തിന്റെ പൂജാ വേളയില്‍ മലയാള സിനിമാ ലോകത്തെ പ്രമുഖരോടൊപ്പം ചരിത്രത്തിലാദ്യമായി ഒരു സിനിമയുടെ ലോഞ്ചിനായി 4 ആഫ്രിക്കന്‍ മന്ത്രിമാരും 2 ഔദ്യോഗിക പദവി വഹിക്കുന്നവരും എത്തിയതും ഈ ചടങ്ങിന് പുതുമയുളവാക്കി.
