മരക്കാര്‍ തിയേറ്ററിലും ഒടിടിയിലും ഒരേ സമയം പ്രദര്‍ശിപ്പിച്ചാല്‍ പ്രശ്‌നമെന്താണെന്ന് കേരള ഫിലിം ഡിസ്ട്രിബ്യൂട്ടേഴ്‌സ് അസോസിയേഷന്‍ സംസ്ഥാന പ്രസിഡന്റ് സിയാദ് കോക്കര്‍. തീയേറ്ററില്‍ സിനിമ കാണുവാന്‍ പ്രേക്ഷകര്‍ കാത്തിരിക്കുകയാണ്. ഈ സവിശേഷ സാഹചര്യത്തില്‍ ഇത്തരം ഒരു പരീക്ഷണത്തിന് ശ്രമിച്ചു കൂടെ എന്ന് അദ്ദേഹം ചോദിച്ചു.
റിപ്പോര്‍ട്ടര്‍ ടിവിയുമായുള്ള പ്രത്യേക അഭിമുഖത്തിലായിരുന്നു സിയാദ് കോക്കറിന്റെ പ്രതികരണം. വളരെ അധികം ശ്രദ്ധേയമായി നില്‍ക്കുന്ന സിനിമയാണ്. മോഹന്‍ലാല്‍ നായകന്‍, അപ്പോള്‍ സ്വാഭാവികമായും പ്രേക്ഷകര്‍ക്ക് സിനിമ തിയേറ്ററില്‍ കാണണമെന്ന് ആഗ്രഹമുണ്ടാകും. ഒടിടി റിലീസ് ചെയ്ത സിനിമ എന്തുകൊണ്ട് തിയേറ്ററില്‍ കാണിക്കാന്‍ പാടില്ല? ഒടിടി എന്നത് ഒരു ചെറിയ പ്ലാറ്റ്ഫോം അല്ലേ? എല്ലാ സാധാരണക്കാരുടെ കൈയിലും ഒടിടി പ്ലാറ്റ്ഫോംസ് ഇല്ലല്ലോ. അപ്പോള്‍ ഇത്ര വലിയ നഷ്ടം ഉണ്ടാകില്ലല്ലോ.
കുറച്ച് ദിവസങ്ങള്‍ക്ക് മുന്‍പാണ് മരക്കാര്‍ ഒടിടി റിലീസ് ചെയ്യുമെന്ന് വിവരം നിര്‍മാതാവായ ആന്റണി പെരുമ്പാവൂര്‍ മാധ്യമങ്ങളെ അറിയിച്ചത്. തൊട്ടുപിന്നാലെ തന്നെ വിഷയത്തില്‍ പ്രതിഷേധവുമായി തിയേറ്റര്‍ ഉടമകളും രംഗത്തെത്തുകയായിരുന്നു. കഴിഞ്ഞ ദിവസം ഇതുമായി ബന്ധപ്പെട്ട് ഫിലിം ചേംബറിന്റെ നേതൃത്വത്തില്‍ യോഗം ചേര്‍ന്നിരുന്നു.
യോഗത്തില്‍ മരക്കാര്‍ സിനിമ തിയേറ്ററില്‍ റിലീസ് ചെയ്യുവാന്‍ നിരവധി ആവശ്യങ്ങളും ആന്റണി പെരൂമ്പാവൂര്‍ മൂന്നോട്ടുവെച്ചിരുന്നു.തിയേറ്ററുടമകള്‍ അഡ്വാന്‍സ് തുക നല്‍കണമെന്നും ഇരുന്നൂറോളം സ്‌ക്രീനുകള്‍ വേണമെന്നുമുള്‍പ്പെടെയുളള നിരവധി ആവശ്യങ്ങളാണ് ആന്റണി പെരുമ്പാവൂര്‍ മുന്നോട്ടുവെക്കുന്നത്.
ഓരോ തിയേറ്റര്‍ ഉടമകള്‍ 25 ലക്ഷം രൂപ അഡ്വാന്‍സ് നല്‍കണം. നഷ്ടം വന്നാല്‍ തിരികെ നല്‍കില്ല. എന്നാല്‍ ലാഭം ഉണ്ടായാല്‍ അതിന്റെ ഷെയര്‍ വേണമെന്നും ആന്റണി പെരുമ്പാവൂര്‍ ആവശ്യപ്പെട്ടു.