ടെലിവിഷനില്‍ തങ്ങളുടെ പ്രിയതാരങ്ങളുടെ സിനിമകള്‍ കാണാന്‍ ആരാധകര്‍ ധാരാളമുണ്ട്. എന്നാല്‍ ഓരേ സിനിമ തന്നെ തുടര്‍ച്ചയായി കാണേണ്ടി വന്നാലോ. ഈ അവസ്ഥയിലായ ഒരു ആരാധകന്റെ ആശങ്കയാണ് ഇപ്പോള്‍ സോഷ്യല്‍മീഡിയയില്‍ വൈറലാകുന്നത്.
ഒരേ സിനിമ തന്നെ എല്ലാ ആഴ്ചയും കാണേണ്ടി വരുന്ന ഗതികേടില്‍ സഹികെട്ട് ചാനല്‍ അധികൃതര്‍ക്ക് അദ്ദേഹം അല്‍പ്പം ദീര്‍ഘമായ ഒരു കത്ത് തന്നെ അയച്ചു. വിമര്‍ശനം നേരിടുന്നത് അമിതാഭ് ബച്ചന്റെ ‘സൂര്യവംശ’മാണ്. 1999ല്‍ പുറത്തിറക്കിയ ചിത്രം എല്ലാ ഞായറാഴ്ചയും നിരന്തരം കാണിക്കുകയായിരുന്നു ചാനല്‍.
ആരാധകന്റെ കത്ത്
‘നിങ്ങളുടെ ചാനല്‍ കാരണം, എനിക്കും എന്റെ കുടുംബത്തിനും ഇപ്പോള്‍ ഹീരാ താക്കൂറിനെയും (സിനിമയില്‍ ബിഗ് ബി അവതരിപ്പിച്ച കഥാപാത്രം) അദ്ദേഹത്തിന്റെ കുടുംബത്തെയും (രാധ, ഗൗരി) ഞങ്ങളുടെ സ്വന്തം ബന്ധുക്കളെ പോലെ അറിയാം.
ഞങ്ങള്‍ക്ക് എല്ലാ ഡയലോഗുകളും മനഃപാഠമാണ്. നിങ്ങള്‍ (ചാനല്‍) ഈ ചിത്രം ഇനിയും എത്ര തവണ സംപ്രേഷണം ചെയ്യുമെന്ന് ഞാന്‍ ചോദിക്കാന്‍ ആഗ്രഹിക്കുന്നു. അങ്ങനെ ചിത്രം സ്ഥിരമായി കാണിക്കുന്നത് എന്റെ മാനസിക നിലയെയും വിവേകത്തെയും ബാധിച്ചാല്‍ ആര് ഉത്തരവാദിത്തമേറ്റെടുക്കും? മുന്‍ഗണനാക്രമത്തില്‍ എന്റെ പരാതി പരിഹരിക്കാന്‍ ഞാന്‍ താഴ്മയോടെ അഭ്യര്‍ത്ഥിക്കുന്നു’