രജനികാന്ത്-ലോകേഷ് കനകരാജ് കോമ്പോയില്‍ ഒരുങ്ങുന്ന ‘കൂലി’യില്‍ മറ്റൊരു മലയാളി താരം കൂടി. നടന്‍ സൗബിന്‍ ഷാഹിര്‍ ചിത്രത്തിന്റെ ഭാഗമാകും എന്ന റിപ്പോര്‍ട്ടുകളാണ് ഇപ്പോള്‍ പുറത്തെത്തുന്നത്. ഗ്രേ ഷെയ്ഡിലുള്ള കഥാപാത്രമാകും നടന്റേത് എന്നാണ് റിപ്പോര്‍ട്ടുകള്‍.
കൂലിയില്‍ സുപ്രധാനമായ കഥാപാത്രത്തെയാകും സൗബിന്‍ അവതരിപ്പിക്കുക എന്നാണ് ഒടിടി പ്ലേ റിപ്പോര്‍ട്ട് ചെയ്യുന്നത്. ഇത് നടന്റെ ആദ്യ തമിഴ് ചിത്രമായിരിക്കും. ഇതില്‍ ഔദ്യോഗിക സ്ഥിരീകരണം ഒന്നും വന്നിട്ടില്ലെങ്കിലും സൗബിന്‍ സെറ്റില്‍ ജോയിന്‍ ചെയ്തതായി റിപ്പോര്‍ട്ടുകളുണ്ട്.
അതേസമയം, ഡേറ്റ് ക്ലാഷിനെ തുടര്‍ന്ന് നടന്‍ ഫഹദ് ഫാസില്‍ ചിത്രത്തില്‍ നിന്നും പിന്മാറിയിരുന്നു. ഫഹദിന് പകരമായാണോ സൗബിന്‍ ചിത്രത്തില്‍ അഭിനയിക്കുന്നത് എന്ന കാര്യത്തില്‍ വ്യക്തതയില്ല. സ്വര്‍ണ്ണ കളക്കടത്തുമായി ബന്ധപ്പെട്ട കഥയാണ് ആക്ഷന്‍ ത്രില്ലര്‍ ഴോണറില്‍ ഒരുങ്ങുന്ന കൂലിയുടെ പ്രമേയം.
38 വര്‍ഷങ്ങള്‍ക്ക് ശേഷം സത്യരാജും രജനികാന്തും ഒരുമിച്ചെത്തുന്ന ചിത്രം കൂടിയാണ് കൂലി. അനിരുദ്ധ് രവിചന്ദര്‍ ആണ് സംഗീതം നിര്‍വ്വഹിക്കുന്നത്. ചിത്രത്തില്‍ ആക്ഷന്‍ കൊറിയോഗ്രഫി ഒരുക്കുന്നത് അന്‍പറിവ് മാസ്റ്റേഴ്സ് ആണ്. ഗിരീഷ് ഗംഗാധരന്‍ ഛായാഗ്രഹണവും ഫിലോമിന്‍രാജ് എഡിറ്റിംഗും നിര്‍വ്വഹിക്കുന്നു.