സിനിമാ ചിത്രീകരണത്തിനിടെ ക്യാമറമാന് തെരുവ് നായയുടെ കടിയേറ്റു. കോഴിക്കോട് മേത്തോട്ടുതാഴത്താണ് സംഭവം. അസോസിയേറ്റ് ക്യാമറമാന് ജോബിന് ജോണിനാണ് കടിയേറ്റത്. ഹരീഷ് പേരടിയുടെ നിര്‍മ്മാണത്തില്‍ ഒരുങ്ങുന്ന ‘ദാസേട്ടന്റെ സൈക്കിള്‍’ സിനിമയുടെ ചിത്രീകരണത്തിനിടെയാണ് സംഭവം.
ശനിയാഴ്ച രാത്രി എട്ടു മണിയോടെയാണ് ജോബിന് തെരുവു നായയുടെ കടിയേറ്റത്. കടിയേറ്റ ക്യമാറമാന്‍ ഉടന്‍ കോഴിക്കോട് മെഡിക്കല്‍ കോളേജിലെത്തി പ്രാഥമിക ചികിത്സയും കുത്തിവെപ്പും എടുത്തുവെന്ന് അധികൃതര്‍ അറിയിച്ചു.
അതേസമയം, ഹരീഷ് പേരടി ആദ്യമായി നിര്‍മ്മിക്കുന്ന ചിത്രമാണ് ദാസേട്ടന്റെ സൈക്കിള്‍. ‘ഐസ് ഒരതി’ എന്ന ചിത്രത്തിലൂടെ ശ്രദ്ധ നേടിയ അഖില്‍ കാവുങ്ങല്‍ തിരക്കഥയെഴുതി സംവിധാനം ചെയ്യുന്ന ചിത്രമാണിത്. ഹരീഷ് പേരടി തന്നെയാണ് ചിത്രത്തില്‍ പ്രധാന കഥാപാത്രമാകുന്നത്.
വൈദി പേരടി, അഞ്ജന അപ്പുക്കുട്ടന്‍, കബനി, എല്‍സി സുകുമാരന്‍, രത്‌നാകരന്‍ എന്നിവരാണ് മറ്റ് കഥാപാത്രങ്ങളെ അവതരിപ്പിക്കുന്നത്. രാഹുല്‍ സി വിമല്‍ ആണ് ചിത്രത്തിന്റെ ഛായാഗ്രഹണം. തോമസ് ഹാന്‍സ് ബെന്നിന്റെ വരികള്‍ക്ക് എ.സി ഗിരീശന്‍ സംഗീതം പകരുന്നു.