കുഞ്ഞില മസിലാമണി ഒരുക്കിയ ‘അസംഘടിതര്‍’ ചിത്രത്തിന് പ്രശംസകളുമായി സംവിധായിക സുധ കൊങ്കര. വാട്‌സ്ആപ്പിലൂടെ അയച്ച സന്ദേശം കുഞ്ഞില തന്നെയാണ് പങ്കുവച്ചിരിക്കുന്നത്. ഫ്രീഡം ഫൈറ്റ് എന്ന ആന്തോളിയിലെ ഒരു ചിത്രമാണ് അസംഘടിതര്‍.
”ഹായ് കുഞ്ഞില, ഇത് ചെന്നൈയില്‍ നിന്നുള്ള സംവിധായിക സുധ കൊങ്കാരയാണ്, ഫ്രീഡം ഫൈറ്റ് ഞാന്‍ കണ്ടു. അതില്‍ നിങ്ങള്‍ സംവിധാനം ചെയ്ത ഭാഗം കണ്ട് കരഞ്ഞു പോയി. ഒരു അസാധാരണ സിനിമ. രജിഷ വഴിയാണ് നിങ്ങളുടെ നമ്പര്‍ സംഘടിപ്പിക്കാന്‍ കഴിഞ്ഞത്.”
”വളരെ സത്യസന്ധവും യഥാര്‍ത്ഥവും പ്രസക്തമവുമായ ഒരു വിഷയം നിങ്ങള്‍ കൈകാര്യം ചെയ്തതിനെ ഞാന്‍ ആരാധനയോടെ കാണുന്നു മാം” എന്നാണ് സുധ കൊങ്കരയുടെ സന്ദേശം.
”എന്നാലും a director from Chennai എന്ന് സ്വയം വിശേഷിപ്പിക്കുന്ന ആ വിനയം- കണ്ണ് നിറഞ്ഞ് പോയി. ഞാന്‍ ആയിരുന്നെങ്കില്‍ ഹലോ സുധ, അയാം ദി മാറുന്ന മോന്ത ഓഫ് മലയാളം സിനിമ എന്ന് പറഞ്ഞ് അയച്ചേനെ” എന്നാണ് സന്ദേശത്തിന്റെ സ്‌ക്രീന്‍ ഷോട്ട് പങ്കുവച്ച് കുഞ്ഞില കുറച്ചിരിക്കുന്നത്.
ജിയോ ബേബി, അഖില്‍ അനില്‍കുമാര്‍, കുഞ്ഞില മാസിലാമണി, ഫ്രാന്‍സിസ് ലൂയിസ്, ജിതിന്‍ ഐസക് തോമസ് എന്നിവരുടെ സിനിമകള്‍ ചേര്‍ത്തുവെച്ച് പുറത്തിറങ്ങിയ ആന്തോളജി സിനിമയാണ് ഫ്രീഡം ഫൈറ്റ്. ഫെബ്രുവരി 11ന് സോണി ലൈവില്‍ റിലീസ് ചെയ്ത സിനിമ സ്വാതന്ത്ര്യത്തെ പ്രമേയമാക്കിയാണ് ഒരുക്കിയിരിക്കുന്നത്.