കെ.ജി.എഫ് ചാപ്റ്റര്‍ ടുവിന്റെ പ്രമോഷനായി യഷിനൊപ്പം ശ്രീനിധി ഷെട്ടിയും സുപ്രിയയും ചിത്രത്തിന്റെ മലയാളം വേര്‍ഷന്‍ ഒരുക്കിയ ശങ്കര്‍ രാമകൃഷ്ണനും എത്തിയിരുന്നു. ഇതിനിടെ ശ്രീനിധിയെ സുപ്രിയയും ശങ്കര്‍ രാമകൃഷ്ണനും അവഗണിച്ചുവെന്ന വിമര്‍ശനങ്ങളും സോഷ്യല്‍ മീഡിയയില്‍ ഉയരുകയും ചെയ്തു.
വേദിയിലേക്ക് കയറിയ സുപ്രിയ നടന്‍ യഷിന് കൈകൊടുത്ത് ഹഗ് ചെയ്തിട്ടും സുപ്രിയയെ കണ്ട് സീറ്റില്‍ നിന്നും എഴുന്നേറ്റ ശ്രീനിധിയെ ഒന്ന് നോക്കാന്‍ പോലും സുപ്രിയ തയ്യാറായില്ലെന്ന വിമര്‍ശനമാണ് സോഷ്യല്‍ മീഡിയയില്‍ നിന്നും ഉയര്‍ന്നത്.
സംഭവത്തില്‍ സുപ്രിയയെ അനുകൂലിച്ചും പ്രതികൂലിച്ചും നിരവധി പ്രതികരണങ്ങളാണ് വന്നത്. എന്നാല്‍ പ്രമോഷന്‍ വേദിയിലേക്ക് നേരത്തെ എത്തിയ ശ്രീനിധി സുപ്രിയയ്‌ക്കൊപ്പമായിരുന്നു താമസിച്ചിരുന്നതെന്ന് പരിപാടിയില്‍ പങ്കെടുത്തവര്‍ പറയുന്നു.
വേദിയിലേക്ക് ഇരുവരും ഒന്നിച്ചാണ് വന്നതും. എന്നാല്‍ പരിപാടിയിലേക്ക് വൈകിയെത്തിയ യഷിനെ സുപ്രിയ വേദിയില്‍ വെച്ചാണ് കണ്ടത്. തുടര്‍ന്നാണ് സുപ്രിയ യഷിന് ഹസ്തദാനം നല്‍കിയത് എന്ന് പരിപാടിയില്‍ പങ്കെടുത്തവര്‍ പറയുന്നു.
