ഏഴ് വര്‍ഷത്തിന് ശേഷം സുരേഷ് ഗോപിയും ജോഷിയും ഒന്നിക്കുന്ന ചിത്രമാണ് ‘പാപ്പന്‍’. ഏബ്രഹാം മാത്യു മാത്തന്‍ എന്ന സുരേഷ് ഗോപിയുടെ നായക വേഷത്തിനൊപ്പം മകന്‍ ഗോകുല്‍ സുരേഷും ചിത്രത്തില്‍ അഭിനയിക്കുന്നുണ്ട്.
ചിത്രത്തിന്റെ മോഷന്‍ പോസ്റ്ററില്‍ മാസ് ലുക്കില്‍ എത്തിയ സുരേഷ് ഗോപിക്കൊപ്പം ഗോകുലും പ്രത്യക്ഷപ്പെട്ടിരുന്നു. ഉടന്‍ റിലീസിനൊരുങ്ങുന്ന ചിത്രത്തില്‍ രണ്ട് തലമുറകളുടെ കൂടിച്ചേരലാണ്. സുരേഷ് ഗോപിയും മകനും സ്‌ക്രീനിലെത്തുമ്പോള്‍ ക്യാമറയ്ക്ക് പിന്നില്‍ ജോഷിയും മകനും എത്തുന്നു.
സംവിധായകന്‍ ജോഷിക്കൊപ്പം ക്രിയേറ്റീവ് ഡയറക്ടറായി മകന്‍ അഭിലാഷ് ജോഷിയും ചിത്രത്തിന്റെ ഭാഗമാകുന്നുണ്ട്. കൂടാതെ ചിത്രത്തിന്റെ നിര്‍മ്മാതാവ് ഡേവിഡ് കാച്ചപ്പിള്ളിയുടെ മകന്‍ അജയ് ഡേവിഡ് കാച്ചപ്പിള്ളിയാണ് ചിത്രത്തിന്റെ ഛായാഗ്രഹണം നിര്‍വ്വഹിക്കുന്നത്.
സണ്ണി വെയ്ന്‍, നൈല ഉഷ, നീത പിള്ള, ആശ ശരത്, കനിഹ, ചന്ദുനാഥ്, വിജയരാഘവന്‍, ടിനി ടോം, ഷമ്മി തിലകന്‍ തുടങ്ങി വമ്പന്‍ താരനിരയാണ് ചിത്രത്തില്‍ അണിനിരക്കുന്നത്. ആര്‍ജെ ഷാന്‍ തിരക്കഥയൊരുക്കുന്നു. എഡിറ്റിംഗ് ശ്യാം ശശിധരന്‍, സംഗീതം ജേക്സ് ബിജോയ്.