നടന്‍ സുരേഷ് ഗോപിയുടെ ഇളയ മകന്‍ മാധവനും സിനിമയിലേക്ക്. സിനിമാ അരങ്ങേറ്റത്തിന് മുമ്പായി മമ്മൂട്ടിയുടെ അനുഗ്രഹം വാങ്ങാനെത്തിയ മാധവിന്റെ ചിത്രങ്ങളാണ് ശ്രദ്ധ നേടുന്നത്. മമ്മൂട്ടിയുടെ കൊച്ചിയിലെ വസതിയില്‍ എത്തിയാണ് മാധവ് താരത്തെ കണ്ടത്.
സംവിധായകന്‍ പ്രവീണ്‍ നാരായണന്‍, ലൈന്‍ പ്രൊഡ്യൂസര്‍ സജിത് കൃഷ്ണ എന്നിവരും മാധവിന് ഒപ്പം ഉണ്ടായിരുന്നു. മാധവിനും ചിത്രത്തിനും മമ്മൂട്ടി വിജയാശംസകള്‍ നേര്‍ന്നു. മമ്മൂട്ടിയുടെ പിആര്‍ഒ റോബര്‍ട്ട് കുര്യാക്കോസ് ആണ് ഇക്കാര്യം സോഷ്യല്‍ മീഡിയയില്‍ പങ്കുവച്ചിരിക്കുന്നത്.
സുരേഷ് ഗോപി നായകനായി എത്തുന്ന കോസ്മോസ് എന്റര്‍റ്റെയിന്‍മെന്റിന്റെ ബാനറില്‍ പ്രവീണ്‍ നാരായണന്‍ എഴുതി സംവിധാനം ചെയ്യുന്ന ചിത്രത്തിലാണ് മാധവ് അഭിനയിക്കുന്നത്. ചിത്രത്തില്‍ ഒരു പ്രധാന കഥാപാത്രത്തെ മാധവ് അവതരിപ്പിക്കും. അനുപമ പരമേശ്വരന്‍ ആണ് നായിക.
‘ചിന്താമണി കൊലക്കേസ്’ എന്ന ചിത്രത്തിന് ശേഷം സുരേഷ് ഗോപി വക്കീല്‍ വേഷത്തില്‍ എത്തുന്നു എന്ന പ്രത്യേകതയും ഈ ചിത്രത്തിനുണ്ട്. നേരത്തെ സുരേഷ് ഗോപിയുടെ ‘വരനെ ആവശ്യമുണ്ട്’ എന്ന ചിത്രത്തില്‍ ചെറിയൊരു സീനില്‍ മാധവ് അഭിനയിച്ചിരുന്നു.
സിനിമയില്‍ അച്ഛന്റെ ഫൈറ്റ് സീന്‍ കണ്ട് സമീപത്തെ ഒരു ഫ്ളാറ്റില്‍ നിന്നും എത്തി നോക്കുന്ന മുഖം മാധവ് സുരേഷിന്റേതായിരുന്നു. എന്നാല്‍ ആരും തിരിച്ചറിയാതെ പോയ സീനിന്റെ മേക്കിംഗ് വീഡിയോ പുറത്തിറങ്ങിയതോടെയാണ് അത് മാധവ് ആണെന്ന് പ്രേക്ഷകര്‍ മനസിലാക്കുന്നത്.