നടി ഭാമയുടെ വിവാഹ വിരുന്നിനിടെ മമ്മൂട്ടിയെ കണ്ടതിന്റെ സന്തോഷം പങ്കുവച്ച് നടന്‍ സുരേഷ് ഗോപി. “മമ്മൂക്കയോടൊപ്പം” എന്ന തലക്കെട്ടോടെ മമ്മൂട്ടിയ്‌ക്കൊപ്പമുള്ള ചിത്രം സുരേഷ് ഫെയ്‌സ്ബുക്കിലൂടെ പങ്കുവെച്ചു. നിറചിരിയോടെയാണ് ഇരുവരും ചിത്രത്തിലുള്ളത്.
ചിത്രം ഇതിനോടകം തന്നെ സോഷ്യല്‍ മീഡിയയില്‍ വൈറലായി കഴിഞ്ഞു. രണ്ടു പേരെയും ഒറ്റ ഫ്രെയിമില്‍ ഒന്നിച്ച് കാണുമ്പോള്‍ ഒരുപാട് സന്തോഷം തോന്നുന്നു എന്നാണ് ആരാധകര്‍ പറയുന്നത്. ചെറിയ ഇടവേളയ്ക്ക് ശേഷം സുരേഷ് ഗോപി വീണ്ടും മലയാള സിനിമയില്‍ സജീവമാകുകയാണ്. അനൂപ് സത്യന്‍ അന്തിക്കാട് സംവിധാനം ചെയ്യുന്ന “വരനെ ആവശ്യമുണ്ട്” പുതിയ ചിത്രം. നിഥിന്‍ രഞ്ജി പണിക്കര്‍ സംവിധാനം ചെയ്യുന്ന “കാവല്‍” ആണ് താരത്തിന്റെ ചിത്രീകരണം പുരോഗമിക്കുന്ന മറ്റൊരു ചിത്രം.
താരസമ്പന്നമായിരുന്നു ഭാമയുടെ വിവാഹ റിസപ്ഷന്‍. മലയാളസിനിമയിലെ പ്രമുഖതാരങ്ങള്‍ എല്ലാം തന്നെ റിസപ്ഷനില്‍ എത്തിയിരുന്നു. ദിലീപ്, കാവ്യ മാധവന്‍, അനു സിത്താര, സലിം കുമാര്‍, രമേശ് പിഷാരടി, ജയസൂര്യ തുടങ്ങി നിരവധി താരങ്ങള്‍ ആശംസകള്‍ അറിയിക്കാന്‍ എത്തിയിരുന്നു. ജനുവരി 30ന് കോട്ടയത്ത് ഒരു സ്വകാര്യ ഹോട്ടലില്‍ വച്ചായിരുന്നു വിവാഹചടങ്ങുകള്‍ നടന്നത്. അടുത്ത ബന്ധുക്കളും സുഹൃത്തുക്കളും മാത്രമാണ് ചടങ്ങില്‍ പങ്കെടുത്തത്.