അടുത്ത വർഷത്തെ പൊങ്കൽ ആഘോഷങ്ങൾക്ക് മാറ്റ് കൂട്ടാൻ വിജയ് സൂര്യ ചിത്രങ്ങൾ ഒന്നിച്ച്. ദളപതി വിജയിയെ നായകനാക്കി വംശി സംവിധാനം നിർവഹിക്കുന്ന വാരിസും, സൂര്യയെ നായകനാക്കി ബാല ഒരുക്കുന്ന സൂര്യ 41മാണ് പൊങ്കൽ ചിത്രങ്ങളായി റീലിസിനെത്തുക.വിജയ് യുടെ അറുപത്തിയാറാം ചിത്രമാണ് വാരിസ്.
രശ്മിക മന്ദനയാണ് ചിത്രത്തിൽ നായികയായെത്തുന്നത്. വംശി, ഹരി, അഹിഷോർ സോളമൻ എന്നിവർ ചേർന്ന് തിരക്കഥയെഴുതിയ ചിത്രം നിർമ്മിക്കുന്നത് പ്രശസ്ത തെലുങ്ക് നിർമ്മാതാവായ ദിൽ രാജുവാണ്. സൂര്യയെ നായകനാക്കി ബാല സംവിധാനം നിർവഹിക്കുന്ന ചിത്രത്തിൽ മലയാളിയായ മമിത ബെെജുവും പ്രധാന കഥാപാത്രത്തിലെത്തുന്നുണ്ട്.
ഇരട്ട വേഷത്തിലാണ് സൂര്യ ചിത്രത്തിൽ എത്തുന്നതെന്നും സൂചനയുണ്ട്. പിതാമഹൻ, നന്ദ എന്നീ ക്ലാസിക് ചിത്രങ്ങൾക്ക് ശേഷം ബാല- സൂര്യ ടീം ഒന്നിക്കുന്ന ചിത്രമാണിത്. 2ഡി എന്റർറ്റെമിന്റെ ബാനറിൽ സൂര്യ തന്നെയാണ് ചിത്രം നിർമ്മിക്കുന്നത്. ചിത്രത്തിൽ സൂര്യയ്ക്കൊപ്പം ജ്യോതിക കൃതിക ഷെട്ടി, മമിതാ ബൈജു എന്നിവരും പ്രധാന വേഷത്തിലെത്തുന്നുണ്ട്.
ഇരുവരുടെയും രണ്ടു ചിത്രങ്ങളും ഒന്നിച്ച് വന്നാൽ ഒരു വലിയ ബോക്സ് ഓഫീസ് പോരാട്ടമായിരിക്കും ആരാധകർക്ക് സമ്മാനിക്കുക. വിജയ് നായകനാവുന്ന വാരിസിൽ തെലുങ്ക് സൂപ്പർ താരം മഹേഷ് ബാബു അതിഥി വേഷത്തിലെത്തുന്നുണ്ടെന്ന വാർത്തകളും പുറത്തു വന്നിരുന്നു.
