വിജയ്‌യുടെ 64 മത് ചിത്രം മാസ്റ്റര്‍ റിലീസിന് തയ്യാറെടുക്കുകയാണ്. ഇപ്പോള്‍ വിജയ്‌യുടെ 65-ാമത് ചിത്രത്തെ കുറിച്ചാണ് ചര്‍ച്ചകള്‍. ചിത്രം ആരാണ് സംവിധാനം ചെയ്യുക എന്നതിനെ കുറിച്ചായിരുന്നു മുഖ്യമായും ആരാധകരുടെ ആകാംക്ഷ. ഇപ്പോഴിതാ അക്കാര്യത്തില്‍ ഒരു വ്യക്തത കൈവന്നിരിക്കുകയാണ്. എ.ആര്‍ മുരുഗദോസ് ആയിരിക്കും ചിത്രം സംവിധാനം ചെയ്യുക എന്നാണ് ഏറ്റവും പുതിയ വിവരം.
തുപ്പാക്കി, കത്തി, സര്‍ക്കാര്‍ എന്നീ വിജയ ചിത്രങ്ങള്‍ക്ക് ശേഷം ഇരുവരും നാലാമതായി ഒന്നിക്കുന്ന ചിത്രമായിരിക്കും ഇത്. സണ്‍ പിക്‌ചേഴ്‌സ് ആണ് ചിത്രത്തിന്റെ നിര്‍മ്മാണം ഏറ്റെടുത്തിരിക്കുന്നത്. ചിത്രത്തിന്റെ തിരക്കഥ ജോലികള്‍ പുരോഗമിക്കുകയാണ്. വരുന്ന ഓഗസ്റ്റ് മാസത്തിന് ശേഷമായിരിക്കും ഷൂട്ടിംഗ് ആരംഭിക്കുക.
ബിഗില്‍ ഓഡിയോ ലോഞ്ച് സമയത്ത് വിജയ്-മുരുഗദോസ് കൂട്ടുകെട്ട് വീണ്ടും ഒന്നിക്കും എന്ന സൂചന ഛായാഗ്രാഹകന്‍ സന്തോഷ് ശിവന്‍ തന്നിരുന്നു. മൂവരും ഒന്നിച്ച തുപ്പാക്കി എന്ന ചിത്രത്തിന്റെ രണ്ടാം ഭാഗം ആയിരിക്കും ഇത് എന്നാണ് സന്തോഷ് അന്ന് ശിവന്‍ പറഞ്ഞത്. ഫിലിം ട്രാക്കര്‍ കൗശിക് ആണ് ദളപതി 65 സംബന്ധിച്ച വിവരം ട്വിറ്റര്‍ വഴി പുറത്തു വിട്ടിരിക്കുന്നത്. എന്നാല്‍ സണ്‍ പിക്‌ചേഴ്‌സിന്റെ ഭാഗത്തു നിന്നും ഔദ്യോഗിക വിവരം ഒന്നും തന്നെ ഇതുവരെ ലഭിച്ചിട്ടില്ല.