വിനയ് ഫോര്‍ട്ട് നായകനായെത്തുന്ന തമാശയുടെ ടീസര്‍ റിലീസ് ചെയ്തു. വിനയ് ഫോര്‍ട്ട് അധ്യാപകന്റെ വേഷത്തിലെത്തുന്ന ചിത്രത്തിന്റെ ടീസര്‍ വളരെ രസകരമായാണ് അവതരിപ്പിച്ചിരിക്കുന്നത്. മികച്ച സ്വീകാര്യതയാണ് ടീസറിന് ലഭിച്ചു കൊണ്ടിരിക്കുന്നത്. പുറത്തിറങ്ങി 16 മണിക്കൂര്‍പിന്നിടുമ്പോള്‍ ടീസര്‍ ഒന്നര ലക്ഷത്തിലധികം കാഴ്ച്ചക്കാരുമായി ട്രെന്‍ഡിംഗില്‍ നാലാമതുണ്ട്.
നവാഗതനായ അഷ്‌റഫ് ഹംസ തിരക്കഥ എഴുതി സംവിധാനം ചെയ്യുന്ന ചിത്രമാണ് തമാശ. ഹാപ്പി ഹവേഴ്‌സിന്റെ ബാനറില്‍ സമീര്‍ താഹിര്‍, ഷൈജു ഖാലിദ്, ലിജോ ജോസ് പെല്ലിശ്ശേരി, ചെമ്പന്‍ വിനോദ് ജോസ് എന്നിവര്‍ ചേര്‍ന്നാണ് ചിത്രത്തിന്റെ നിര്‍മ്മാണം. ഒരിടവേളക്ക് ശേഷം സമീര്‍ താഹിര്‍ ചായഗ്രഹണം നിര്‍വഹിക്കുന്ന റൊമാന്റിക്ക് കോമഡി ചിത്രത്തില്‍ ദിവ്യ പ്രഭ, ഗ്രേസ് ആന്റണി, ചിന്നു സരോജിനി, എന്നിവര്‍ നായികമാരായി എത്തുന്നു. നവാസ് വള്ളിക്കുന്ന്, അരുണ്‍ കുര്യന്‍, ആര്യ സാലിം എന്നിവരാണ് മറ്റ് പ്രധാന കഥാപാത്രങ്ങള്‍.
മുഹ്‌സിന്‍ പരാരിയുടെ വരികള്‍ക്ക് റെക്‌സ് വിജയന്‍, ഷഹബാസ് അമന്‍ എന്നിവര്‍ സംഗീത സംവിധാനം നിര്‍വഹിച്ചിരിക്കുന്നു. എഡിറ്റിംഗ് ഷഫീഖ് മുഹമ്മദ് അലി. ചിത്രം ഈദ് റിലീസായി തിയേറ്ററുകളില്‍ എത്തും.