കമല്‍ ഹാസന്‍- ലോകേഷ് കനകരാജ് ചിത്രം വിക്രത്തില്‍ നായികയായഭിനയിച്ചു ശ്രദ്ധ നേടിയ നടി ഗായത്രി ശങ്കര്‍ കുഞ്ചാക്കോ ബോബന്റെ നായികയാവുന്നു. ആന്‍ഡ്രോയിഡ് കുഞ്ഞപ്പന്‍, കനകം കാമിനി കലഹം എന്നീ സിനിമകള്‍ക്കു ശേഷം രതീഷ് പൊതുവാള്‍ സംവിധാനം ചെയ്യുന്ന
‘എന്നാ താന്‍ കേസ് കൊട്’ എന്ന ചിത്രത്തിലാണ് ഗായത്രി നായികയാവുന്നത്.
കൊഴുമ്മല്‍ രാജീവന്‍ അഥവാ അംബാസ് രാജീവന്‍ എന്നാ കഥാപാത്രമായാണ് ചിത്രത്തില്‍ കുഞ്ചാക്കോ ബോബനഭിനയിച്ചിരിക്കുന്നത്. വിനയ് ഫോര്‍ട്ട് ഗായത്രി ശങ്കര്‍, സൈജു കുറുപ്പ്, ജാഫര്‍ ഇടുക്കി എന്നിവരും ചിത്രത്തില്‍ പ്രധാന കഥാപാത്രങ്ങളെ അവതരിപ്പിക്കുന്നു. ഒരുപറ്റം പുതുമുഖങ്ങളും ചിത്രത്തിലുണ്ട്.
എസ്.ടി.കെ ഫിലിംസിന്റെ ബാനറില്‍ സന്തോഷ് ടി. കുരുവിളയാണ് ചിത്രം നിര്‍മ്മിക്കുന്നത്. മഹേഷിന്റെ പ്രതികാരം, മായാനദി, ആന്‍ഡ്രോയ്ഡ് കുഞ്ഞപ്പന്‍, വൈറസ്, ആര്‍ക്കറിയാം, നാരദന്‍ എന്നീ സിനിമകള്‍ക്കു ശേഷം സന്തോഷ് ടി കുരുവിള നിര്‍മ്മിക്കുന്ന ചിത്രമാണിത്.
ഹിന്ദി ചിത്രം ഷെര്‍ണിക്ക് ക്യാമറ ചലിപ്പിച്ച രാകേഷ് ഹരിദാസാണ് ഈ ചിത്രത്തിന്റെയും ഛായാഗ്രാഹകന്‍. ചിത്രം എഡിറ്റ് ചെയ്യുന്നത് മനോജ് കണ്ണോത്, സംഗീതം ഡോണ്‍ വിന്‍സെന്റ്.
