തല അജിത് നായകനായി എത്തിയ ഏറ്റവും പുതിയ ചിത്രം തുനിവ് ജനുവരി പതിനൊന്നിന് പൊങ്കല്‍ റിലീസായാണ് എത്തിയത്. നേര്‍ക്കൊണ്ട പാര്‍വൈ, വലിമയ് എന്നിവക്ക് ശേഷം അജിത്- എച്ച് വിനോദ് ടീം ഒന്നിച്ച ഈ ചിത്രത്തിന് സമ്മിശ്ര പ്രതികരണമാണ് ലഭിച്ചതെങ്കിലും ബോക്‌സ് ഓഫീസില്‍ മികച്ച പ്രകടനമാണ് തുനിവ് കാഴ്ച വെക്കുന്നത്.
ചിത്രത്തിന്റെ ആദ്യ മൂന്നു ദിവസത്തെ ആഗോള കളക്ഷന്‍ റിപ്പോര്‍ട്ട് എത്തി. ആദ്യ മൂന്ന് ദിവസം കൊണ്ട് തമിഴ്‌നാട് നിന്ന് മാത്രം 46 കോടി രൂപ നേടിയ ഈ ചിത്രം ആകെ മൊത്തം ഇന്ത്യയില്‍ നിന്നും നേടിയത് 70 കോടിയോളമാണ്.
വിദേശത്തും മികച്ച പ്രകടനം കാഴ്ച വെക്കുന്ന ചിത്രം ഇതിനോടകം 93 കോടി രൂപയുടെ ആഗോള കളക്ഷന്‍ ആണ് നേടിയിരിക്കുന്നത്. നോ ഗട്ട്‌സ് നോ ഗ്ലോറി എന്നാണ് ഈ ഹെയ്സ്റ്റ് ത്രില്ലര്‍ ചിത്രത്തിന്റെ ടാഗ് ലൈന്‍. തല അജിത് കുമാര്‍, നായികാ വേഷം ചെയ്ത മഞ്ജു വാര്യര്‍ എന്നിവരുടെ പ്രകടനമാണ് ഈ ചിത്രത്തിന്റെ ഹൈലൈറ്റ്.
ജോണ്‍ കൊക്കന്‍, സമുദ്രക്കനി, മമതി ചാരി, പ്രേം കുമാര്‍, വീര, മഹാനദി ശങ്കര്‍, നയന സായി, ആമിര്‍, സിബി ചന്ദ്രന്‍, അജയ്, പവാനി റെഡ്ഢി എന്നിവരും അഭിനയിച്ച ഈ ചിത്രം ബേ വ്യൂ പ്രോജെക്ടസിന്റെ ബാനറില്‍ ബോളിവുഡ് നിര്‍മ്മാതാവായ ബോണി കപൂര്‍, സീ സ്റ്റുഡിയോസ് എന്നിവര്‍ ചേര്‍ന്നാണ് നിര്‍മ്മിച്ചിരിക്കുന്നത്. ജിബ്രാന്‍ ആണ് ഈ ചിത്രത്തിന് വേണ്ടി സംഗീത സംവിധാനം നിര്‍വഹിച്ചിരിക്കുന്നത്.