ടിനു പാപ്പച്ചന്റെ സംവിധാനത്തിലൊരുങ്ങുന്ന അടുത്ത ചിത്രത്തില്‍ മോഹന്‍ലാല്‍ നായക വേഷത്തിലെത്തുമെന്ന് റിപ്പോര്‍ട്ട്. തെലുങ്ക് താരം വിജയ് ദേവരകൊണ്ടയ്ക്കൊപ്പമുള്ള ടിനു പാപ്പച്ചന്റെ ചിത്രം കഴിഞ്ഞ ദിവസം സോഷ്യല്‍ മീഡിയയില്‍ ഏറെ ചര്‍ച്ചാ വിഷയമായിരുന്നു.
ലിജോ – മോഹന്‍ലാല്‍ ചിത്രം മലൈക്കോട്ടൈ വാലിബനില്‍ വിജയ് ദേവരകൊണ്ട എത്തുമോ എന്നതായിരുന്നു പ്രധാന ചര്‍ച്ച.എന്നാല്‍ ടിനു ഹൈദരബാദിലെത്തിയത് മറ്റൊരു പ്രൊജക്റ്റ് ചര്‍ച്ച ചെയ്യാനാണെന്നാണ് ഇപ്പോള്‍ വരുന്ന റിപ്പോര്‍ട്ട്.
അല്ലു അര്‍ജുനും ഫഹദ് ഫാസിലും ഒന്നിച്ച പുഷ്പ സിനിമയുടെ നിര്‍മ്മാതാക്കളായ മൈത്രി മൂവി മേക്കേഴ്സ് മോഹന്‍ലാല്‍ സിനിമയ്ക്കായി ടിനുവിന് കൈ കൊടുത്തുവെന്നാണ് വിവരം. മൈത്രി മൂവി മേക്കേഴ്സ് 2016 ല്‍ പുറത്തിറക്കിയ തെലുങ്ക് ചിത്രം ജനതാ ഗാരേജിലും മോഹന്‍ലാല്‍ അഭിനയിച്ചിരുന്നു.
ഒരു ബിഗ് ബജറ്റ് ആക്ഷന്‍ ചിത്രമാണ് അണിയറയില്‍ ഒരുങ്ങുന്നതെന്നാണ് വിവരം. ഈ വര്‍ഷം അവസാനത്തോടെ മാത്രമേ ചിത്രത്തിന്റെ ഷൂട്ടിങ്ങ് ആരംഭിക്കുകയുള്ളൂ. ലിജോ ജോസ് പെല്ലിശ്ശേരി സംവിധാനം ചെയ്യുന്ന മലൈക്കോട്ടൈ വാലിബനില്‍ രണ്ട് മാസത്തെ ഷെഡ്യൂളാണ് താരത്തിനുള്ളത്. രജനീകാന്തിനൊപ്പം ജയിലറിലും മോഹന്‍ലാല്‍ പ്രധാന വേഷത്തില്‍ എത്തുന്നുണ്ട്.