സ്വാതന്ത്ര്യം അര്‍ദ്ധരാത്രിക്ക് ശേഷം ടിനു പാപ്പച്ചന്‍ സംവിധാനം ചെയ്ത് ആന്റണി വര്ഗീസ് നായകനാകുന്ന അജഗജാന്തരത്തിന്റെ ഷൂട്ടിംഗ് പൂര്‍ത്തിയായി. ആന്റണി വര്‍ഗ്ഗീസ് തന്നെയാണ് ഇക്കാര്യം ആരാധകരെ അറിയിച്ചിരിക്കുന്നത്. പേര് കൊണ്ടും പോസ്റ്റേഴ്സ് കൊണ്ടും പ്രേക്ഷകരെ ഞെട്ടിച്ച് വന്‍ പ്രതീക്ഷയാണ് ചിത്രം നല്‍കുന്നത്. പൂരവും വെടിക്കെട്ടും നാടന്‍ തല്ലും ഒക്കെയായി പ്രേക്ഷകര്‍ക്ക് ഒരടിപൊളി പൂരകാഴ്ച്ച തന്നെയായിരിക്കും ചിത്രം സമ്മാനിക്കുന്നതെന്ന് പ്രതീക്ഷിക്കാം.
ജെല്ലിക്കട്ടിന് ശേഷം ആന്റണി വര്‍ഗ്ഗീസ് നായകനാകുന്ന ചിത്രം കൂടിയാണ് അജഗജാന്തരം. ചിത്രത്തിന്റെ തിരക്കഥയൊരുക്കുന്നത് കിച്ചു ടെല്ലസും വിനീത് വിശ്വവും ചേര്‍ന്നാണ്. ആന്റണി വര്‍ഗീസിനൊപ്പം ചെമ്പന്‍ വിനോദ്, അര്‍ജുന്‍ അശോക്, സാബുമോന്‍, സുധി കോപ്പ, ലുക്ക് മാന്‍, ജാഫര്‍ ഇടുക്കി, കിച്ചു ടെല്ലസ്, സിനോജ് വര്ഗീസ്, വിനീത് വിശ്വം, ബിറ്റോ ഡേവിസ്, രാജേഷ് ശര്‍മ്മ, ടിറ്റോ വില്‍സണ്‍, വിജ്ലീഷ് തുടങ്ങിയവാരാണ് ചിത്രത്തില്‍ മറ്റ് പ്രധാന കഥാപാത്രത്തെ അവതരിപ്പിക്കുന്നത്.
ഇമ്മാനുവല്‍ ജോസഫ്, അജിത് തലപ്പിള്ളി എന്നിവര്‍ ചേര്‍ന്നാണ് അജഗജാന്തരം നിര്‍മ്മിക്കുന്നത്. ജിന്റോ ജോര്‍ജ് ആണ് ചിത്രത്തിന്റെ ഛായാഗ്രാഹകന്‍. എഡിറ്റര്‍ ഷമീര്‍ മുഹമ്മദ്. സംഗീതം ജേക്‌സ് ബിജോയ്. സെന്‍ട്രല്‍ പിക്ചര്‍സ് ആണ് ചിത്രം വിതരണത്തിന് എത്തിക്കുന്നത്.