ഫഹദ് ഫാസിലിനെ നായകനാക്കി അന്‍വര്‍ റഷീദ് സംവിധാനം ചെയ്യുന്ന ട്രാന്‍സിന്റെ റിലീസ് ഡേറ്റ് മാറ്റി. വേനലവധി കണക്കാക്കി ഏപ്രിലിലോ മറ്റോ റിലീസ് ചെയ്യാനായിരുന്നു ആദ്യ പദ്ധതി. എന്നാല്‍, ഷൂട്ടിംഗ് നീണ്ടു പോയതു കൊണ്ടും പോസ്റ്റ് പ്രൊഡക്ഷന്‍ വര്‍ക്കുകള്‍ തീരാന്‍ സാധ്യതയില്ലാത്തത് കൊണ്ടും റംസാന്‍ സമയത്തേക്ക് റിലീസ് നീട്ടാനാണ് പദ്ധതി. റിലീസ് തിയതി സംബന്ധിച്ച് തീരുമാനം ആയിട്ടില്ലെങ്കിലും റംസാന്‍ റിലീസ് ആയിട്ടായിരിക്കും ട്രാന്‍സ് എത്തുക.
ജനുവരി അവസാനത്തോടെയായിരിക്കും ട്രാന്‍സിന്റെ മൂന്നാം ഷെഡ്യൂള്‍ ഷൂട്ടിംഗ് ആരംഭിക്കുക.
ഉസ്താദ് ഹോട്ടലിന് ശേഷം ഏതാണ്ട് അഞ്ചു വര്‍ഷത്തെ ഇടവേളയ്ക്ക് ശേഷമാണ് അന്‍വര്‍ റഷീദ് സംവിധാനത്തിലേക്ക് മടങ്ങി എത്തുന്നത്. അന്‍വര്‍ റഷീദ് എന്റര്‍ടെയ്ന്‍മെന്റ്‌സിന്റെ ബാനറില്‍ സംവിധായകന്‍ തന്നെയാണ് ചിത്രം നിര്‍മ്മിക്കുന്നതും. റസൂല്‍ പൂക്കുട്ടി, വിന്‍സെന്റ് വടക്കന്‍, അമല്‍ നീരദ് തുടങ്ങിയ മികച്ച ടീമാണ് ട്രാന്‍സിന്റെ പിന്നണിയില്‍ പ്രവര്‍ത്തിക്കുന്നത്. കന്യാകുമാരി, നാഗര്‍കോവില്‍ തുടങ്ങിയ സ്ഥലങ്ങളിലെ ഷൂട്ടിംഗ് പൂര്‍ത്തിയാക്കിയശേഷമാണ് കൊച്ചിയിലെ ഷൂട്ടിംഗിന്റെ ഷെഡ്യൂള്‍ എന്നാണ് വിവരം.
നേരത്ത ട്രാന്‍സിന്റെ ഫസ്റ്റ്‌ലുക്ക് പോസ്റ്റര്‍ പുറത്തുവന്നത് സോഷ്യല്‍ മീഡിയയിലെ സിനിമാ ഗ്രൂപ്പുകളില്‍ ചര്‍ച്ച ഉയര്‍ത്തിയിരുന്നു. ട്രാന്‍സ് ഫസ്റ്റ്‌ലുക്കില്‍ ഒളിപ്പിച്ചുവെച്ചിരിക്കുന്ന നിഗൂഢതകളായിരുന്നു സിനിമാ ഗ്രൂപ്പുകളിലെ ചര്‍ച്ചയില്‍ കേന്ദ്രബിന്ദുവായത്. വിനായകന്‍, സൗബിന്‍ സാഹിര്‍, ചെമ്പന്‍ വിനോദ്, ശ്രീനാഥ് ഭആസി. അല്‍ഫോണ്‍സ് പുത്രന്‍ തുടങ്ങിയവരാണ് സിനിമയിലെ മറ്റ് കഥാപാത്രങ്ങള്‍.