ആരാധകര്‍ ആവേശത്തോടെ കാത്തിരിക്കുന്ന “രണ്ടാമൂഴം” ചിത്രത്തെ കുറിച്ചുള്ള സൂചന നല്‍കി സംവിധായകന്‍ വി. എ. ശ്രീകുമാര്‍. മോഹന്‍ലാലിന് അറുപതാം ജന്മദിനാശംസകള്‍ നേര്‍ന്നാണ് രണ്ടാമൂഴം നടക്കുമെന്ന് ശ്രീകുമാര്‍ ആരാധകര്‍ക്ക് സൂചന നല്‍കിയിരിക്കുന്നത്.
“”എന്റെ ഭീമന്… സഫലമാകുന്ന ആ സ്വപ്നത്തിന്”” എന്നാണ് ശ്രീകുമാറിന്റെ പോസ്റ്റ്. ഭീമന്റെ വേഷത്തിലുള്ള മോഹന്‍ലാലിന്റെ രൂപവും സംവിധായകന്‍ പങ്കുവെച്ചിട്ടുണ്ട്. എം.ടി വാസുദേവന്‍നായരുടെ തിരക്കഥയില്‍ മോഹന്‍ലാല്‍ ഭീമനായെത്തുന്നുവെന്ന് നേരത്തേ വാര്‍ത്തകള്‍ വന്നിരുന്നു.
എന്നാല്‍ പിന്നീട് ഇത് വിവാദമാവുകയും കേസാവുകയുമായിരുന്നു. 2014-ല്‍ ആയിരുന്നു “രണ്ടാമൂഴം” സിനിമയാക്കാന്‍ എം.ടി വാസുദേവന്‍ നായരും ശ്രീകുമാറും കരാറില്‍ ഒപ്പു വെച്ചത്. മൂന്നു വര്‍ഷത്തിനുള്ളില്‍ സിനിമ ചെയ്യുമെന്നായിരുന്നു കരാര്‍.
എന്നാല്‍, കരാറിലെ കാലാവധി കഴിഞ്ഞ് ഒരു വര്‍ഷം കഴിഞ്ഞിട്ടും സിനിമ യാഥാര്‍ത്ഥ്യമായില്ല. തുടര്‍ന്നാണ്, രണ്ടാമൂഴം സിനിമയാകുന്നത് തടയണമെന്ന് ആവശ്യപ്പെട്ട് എം ടി കോടതിയെ സമീപിച്ചത്. പരാതിയെ തുടര്‍ന്ന് മുന്‍സിഫ് കോടതി രണ്ടാമൂഴം സിനിമയാക്കുന്നതില്‍ നിന്ന് ശ്രീകുമാര്‍ മേനോനെ വിലക്കുകയായിരുന്നു.