പന്നൈയാരും പത്മിനിയും, സേതുപതി, സിന്ധുബാദ്, ചിത്ത എന്നീ ചിത്രങ്ങൾക്ക് ശേഷം എസ്. യു അരുൺ കുമാർ സംവിധാനം ചെയ്യുന്ന വിക്രമിന്റെ 62-മത് സിനിമയ്ക്ക് ‘ചിയാൻ 62’ എന്നാണ് ടാഗ് ലൈൻ കൊടുത്തിരുന്നത്.
ഇപ്പോഴിതാ ചിത്രത്തിന്റെ ടൈറ്റിൽ പുറത്തുവിട്ടിരിക്കുകയാണ് അണിയറപ്രവർത്തകർ. ‘വീര ധീര സൂരൻ’ എന്നാണ് ചിത്രത്തിന്റെ ടൈറ്റിൽ. ആക്ഷൻ ത്രില്ലർ ഴോണറിലാണ് ചിത്രമൊരുങ്ങുന്നത്. വിക്രമിന്റെ ജന്മദിനത്തോടനുബന്ധിച്ചാണ് ഇപ്പോൾ ടൈറ്റിൽ ടീസർ പുറത്തുവിട്ടിരിക്കുന്നത്.
ദുഷാര വിജയൻ ആണ് ചിത്രത്തിൽ വിക്രമിന്റെ നായികയായെത്തുന്നത്. സുരാജ് വെഞ്ഞാറമൂടും എസ്. ജെ സൂര്യയും ചിത്രത്തിൽ ഒരു പ്രധാന കഥാപാത്രങ്ങളാണ്.
ജി. വി പ്രകാശ്കുമാർ സംഗീതം നിർവഹിക്കുന്ന ചിത്രം എച്ച്ആർ പിക്‌ചേഴ്‌സിന്റെ ബാനറിൽ റിയ ഷിബു ആണ് നിർമ്മിക്കുന്നത്. തേനി ഈശ്വർ ആണ് ചിത്രത്തിന് വേണ്ടി ഛായാഗ്രഹണം നിർവഹിക്കുന്നത്.
അതേസമയം പാ രഞ്ജിത്ത് ചിത്രം ‘തങ്കലാൻ’ ജന്മദിന ട്രിബ്യൂട്ട് വീഡിയോയും ഇന്ന് പുറത്തുവിട്ടിരുന്നു. പാർവതി തിരുവോത്ത്, മാളവികാ മോഹനന്‍, പശുപതി, ഹരികൃഷ്ണന്‍ അന്‍പുദുരൈ, പ്രീതി കരണ്‍, മുത്തുകുമാര്‍ തുടങ്ങിയവരാണ് മറ്റ് അഭിനേതാക്കള്‍. ‘നച്ചത്തിരം നഗര്‍കിറത്’ എന്ന ചിത്രത്തിന് ശേഷം പാ രഞ്ജിത് സംവിധാനം ചെയ്യുന്ന ചിത്രമാണ് തങ്കലാന്‍. സംവിധായകന്‍ പാ രഞ്ജിത്തും തമിഴ് പ്രഭും ചേര്‍ന്നാണ് തിരക്കഥ രചിച്ചിരിക്കുന്നത്.
