റോമ, നൂറിന്‍ ഷെരീഫ്, അക്ഷയ് രാധാകൃഷ്ണന്‍ എന്നിവര്‍ കേന്ദ്ര കഥാപാത്രങ്ങളാകുന്ന “വെള്ളേപ്പം” സിനിമയുടെ മേക്കിംഗ് വീഡിയോ പുറത്ത്. നവാഗതനായ പ്രവീണ്‍ രാജ് പൂക്കാടന്‍ സംവിധാനം ചെയ്യുന്ന ചിത്രം തൃശൂരിലെ വെള്ളേപ്പങ്ങാടിയുടെ പശ്ചാത്തലത്തിലത്തിലാണ് കഥ പറയുന്നത്.
മൂന്ന് വര്‍ഷത്തെ ഇടവേളയ്ക്ക് ശേഷം റോമ മലയാള സിനിമയിലേക്ക് തിരിച്ചെത്തുന്ന ചിത്രം കൂടിയാണിത്. ഷൈന്‍ ടോം ചാക്കോ, ശ്രീജിത്ത് രവി, കൈലാഷ്, സാജിദ് യഹിയ, രാജന്‍, അലീന, ക്ഷമ തുടങ്ങിയവരാണ് ചിത്രത്തിലെ മറ്റു പ്രധാന താരങ്ങള്‍. നവാഗതനായ ജീവന്‍ ലാലാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്.
ഛായാഗ്രഹണം ഷിഹാബാണ് നിര്‍വ്വഹിക്കുന്നത്. പൂമരം, തൊട്ടപ്പന്‍ തുടങ്ങിയ ചിത്രങ്ങള്‍ക്ക് ഗാനം ഒരുക്കിയ ലീല എല്‍. ഗിരീഷ്‌കുട്ടനാണ് ചിത്രത്തിന്റെ സംഗീത സംവിധാനം നിര്‍വഹിക്കുന്നത്. പൂമുത്തോളെ എന്ന സൂപ്പര്‍ ഹിറ്റ് ഗാനം രചിച്ച അജേഷ് എം ദാസനും, കുടുക്ക് പൊട്ടിയ കുപ്പായം എന്ന സൂപ്പര്‍ ഹിറ്റ് ഗാനത്തിന് വരികള്‍ ഒരുക്കിയ മനു മഞ്ജിത്തുമാണ് വെള്ളേപ്പത്തിനും വരികളെഴുതുന്നത്.
റോഷന്‍ ആന്‍ഡ്രൂസ് ചിത്രം “നോട്ട്ബുക്ക്” ആണ് റോമയുടെ ആദ്യ മലയാള ചിത്രം. ജൂലൈ 4, ചോക്ലേറ്റ്, മിന്നാമിന്നിക്കൂട്ടം, ലോലിപോപ്പ്, കളേഴ്‌സ്, ട്രാഫിക്, കാസന്നോവ തുടങ്ങിയ ചിത്രങ്ങളില്‍ ശ്രദ്ധേയമായ വേഷങ്ങള്‍ ചെയ്തിരുന്നു. ജയറാം ചിത്രം സത്യ ആണ് റോമയുടെതായി റിലീസ് ചെയ്ത ഒടുവിലത്തെ ചിത്രം.