ഏറെ പ്രത്യേകതകളോടെയാണ് രജനികാന്ത് ചിത്രം ‘വേട്ടയ്യന്‍’ തിയേറ്ററുകളിലേക്ക് എത്തുന്നത്. ഒക്ടോബര്‍ 10ന് റിലീസ് ചെയ്യുന്ന ചിത്രത്തില്‍ അമിതാഭ് ബച്ചന്, മഞ്ജു വാര്യര്‍ തുടങ്ങിയ താരങ്ങളും വേഷമിടുന്നുണ്ട്. ചിത്രം തിയേറ്ററുകളിലേക്ക് എത്തുമ്പോള്‍ താരങ്ങളുടെ പ്രതിഫലവുമായി ബന്ധപ്പെട്ട വാര്‍ത്തകളാണ് ശ്രദ്ധ നേടുന്നത്. കോയ്മോയ് എന്ന വെബ്‌സൈറ്റ് ആണ് താരങ്ങളുടെ പ്രതിഫല കണക്ക് പുറത്തുവിട്ടത്.
ചിത്രത്തില്‍ ഏറ്റവും കൂടുതല്‍ പ്രതിഫലം വാങ്ങുന്നത് രജനികാന്ത് തന്നെയാണ്. താരം 125 കോടി രൂപ പ്രതിഫലം വാങ്ങിയതായാണ് റിപ്പോര്‍ട്ടുകള്‍. അമിതാഭ് ബച്ചന് വാങ്ങുന്നത് 7 കോടി രൂപയാണ്. 33 വര്‍ഷങ്ങള്‍ക്ക് ശേഷമാണ് രജനിയും ബച്ചനും വീണ്ടും ഒരു സ്‌ക്രീനില്‍ ഒന്നിച്ചെത്തുന്നത് എന്ന പ്രത്യേകതയും ചിത്രത്തിനുണ്ട്.
പുഷ്പ, മാമന്നന്‍, ആവേശം തുടങ്ങിയ ചിത്രങ്ങളിലൂടെ താരമൂല്യം ഉയര്‍ന്ന ഫഹദ് ചിത്രത്തിനായി 4 കോടി രൂപയാണ് പ്രതിഫലം വാങ്ങുന്നത്. പാട്രിക് എന്ന കള്ളന്‍ കഥാപാത്രമായാണ് ഫഹദ് ചിത്രത്തില്‍ എത്തുന്നത്. അഞ്ച് കോടി രൂപയാണ് നടന്‍ റാണ ദഗുബതി സിനിമയ്ക്കായി വാങ്ങുന്നത്.
മൂന്ന് കോടി രൂപയാണ് സിനിമയില്‍ മഞ്ജു വാര്യരുടെ പ്രതിഫലം. ചിത്രത്തില്‍ ഏറ്റവും കുറവ് പ്രതിഫലം നടി റിതിക സിംഗിനാണ്. 25 ലക്ഷം രൂപയാണ് ചിത്രത്തിനായി റിതിക വാങ്ങുന്നത്. വേട്ടയ്യനില്‍ ഒരു പ്രധാന കഥാപാത്രത്തെ തന്നെയാണ് റിതിക അവതരിപ്പിക്കുന്നത്.
അതേസമയം, ചിത്രത്തില്‍ എന്‍കൗണ്ടര്‍ സ്പെഷലിസ്റ്റ് ആയാണ് രജനി വേഷമിടുന്നത്. എന്‍കൗണ്ടറിനെ എതിര്‍ക്കുന്ന സത്യദേവ് എന്ന ഉദ്യോഗസ്ഥനായാണ് അമിതാഭ് ബച്ചന് എത്തുന്നത്. സിനിമയില്‍ രജനികാന്തിന്റെ ഭാര്യ ആയാണ് മഞ്ജു വാര്യര്‍ വേഷമിടുന്നത്. താര എന്നാണ് മഞ്ജു വാര്യരുടെ കഥാപാത്രത്തിന്റെ പേര്.