‘ഖുഷി’ വിജയ് ദേവരകൊണ്ടയുടെയും സാമന്തയുടെയും തിരിച്ചുവരവ് എന്ന് റിപ്പോര്‍ട്ടുകള്‍. ഇന്നലെ തിയേറ്ററുകളില്‍ എത്തിയ ചിത്രത്തിന് മികച്ച പ്രതികരണങ്ങളാണ് ലഭിച്ചു കൊണ്ടിരിക്കുന്നത്. ചിത്രത്തിന്റെ ഓപ്പണിംഗ് ദിന കളക്ഷന്‍ ആണ് ഇപ്പോള്‍ പുറത്തു വന്നിരിക്കുന്നത്.
ചിത്രം ആദ്യ ദിനം 26 കോടി രൂപ ആഗോളതലത്തില്‍ നേടിയെന്നാണ് റിപ്പോര്‍ട്ടുകള്‍. ആന്ധ്രാ ബോക്‌സ്ഓഫീസ് ഡോട് കോം ആണ് കളക്ഷന്‍ റിപ്പോര്‍ട്ട് പുറത്തുവിട്ടിരിക്കുന്നത്. ശിവ നിര്‍വാണയാണ് ചിത്രത്തിന്റെ സംവിധാനം. ഒരു റൊമാന്റിക് കോമഡി ചിത്രമായിട്ടാണ് ഖുഷി ഒരുക്കിയിരിക്കുന്നത്.
‘വിപ്ലവ്’ എന്ന നായകനായി വിജയ് ദേവരകൊണ്ട എത്തിയപ്പോള്‍, ‘ആരാധ്യ’ എന്ന നായികയായാണ് സാമന്തയും വേഷമിട്ടത്. വ്യത്യസ്ത വീക്ഷണകോണില്‍ ജീവിക്കുന്ന ഇരുവരും വിവാഹിതരാകുന്നതോടെ നടക്കുന്ന സംഘര്‍ഷങ്ങളാണ് ചിത്രത്തിന്റെ പ്രമേയം.
അതേസമയം, വിജയ് ദേവരകൊണ്ടയുടെ ഒടുവില്‍ പുറത്തിറങ്ങിയ ‘ലൈഗര്‍’ അടക്കമുള്ള ചിത്രങ്ങള്‍ പരാജയപ്പെട്ടിരുന്നു. സമാന്തയുടെതായി ഒടുവില്‍ പുറത്തിറങ്ങിയ ‘യശോദ’, ‘ശാകുന്തളം’ എന്നീ സിനിമകളും ബോക്‌സോഫീസില്‍ കനത്ത പരാജയമായിരുന്നു.