പൊങ്കല്‍ റിലീസ് ആയി തിയേറ്ററുകളിലെത്താന്‍ ഒരുങ്ങുന്ന വിജയ് ചിത്രം ‘വാരിസ്’ പ്രതിസന്ധിയില്‍. ദസറ, സംക്രാന്തി സീസണുകളില്‍ തെലുങ്ക് സിനിമകള്‍ക്ക് പ്രാധാന്യം നല്‍കിയാല്‍ മതിയെന്നും, മൊഴിമാറ്റിയെത്തുന്ന ചിത്രങ്ങളെ പരിഗണിക്കേണ്ട എന്ന് തെലങ്കാനയിലെയും ആന്ധ്രയിലെയും തിയേറ്റര്‍ ഉടമകള്‍ നിര്‍ദേശിച്ചതോടെയാണ് വാരിസ് പ്രതിസന്ധിയില്‍ ആയിരിക്കുന്നത്.
ചിരഞ്ജീവിയുടെ ‘വാള്‍ട്ടര്‍ വീരയ്യ’, നന്ദമൂരി ബാലകൃഷ്ണയുടെ ‘വീരസിംഹ റെഡ്ഡി’ എന്നീ സിനിമകളാണ് തെലുങ്കില്‍ പൊങ്കല്‍ റിലീസ് ആയി എത്തുന്നത്. വംശി പൈഡിപ്പള്ളി സംവിധാനം ചെയ്യുന്ന വാരിസ് തമിഴിനൊപ്പം തെലുങ്കിലുമാണ് ഒരുക്കിയത്. ഒരേ ദിവസം തന്നെ രണ്ടു സിനിമകള്‍ റിലീസ് ചെയ്യാനിരുന്നതാണ്.
എന്നാല്‍ തിയേറ്റര്‍ ഉടമകളുടെ നിര്‍ദേശം വാരിസിന്റെ തെലുങ്ക് വേര്‍ഷനെ ബാധിക്കും. ‘വാരസുഡു’ എന്ന പേരിലാണ് തെലുങ്ക് വേര്‍ഷന്‍ വരുന്നത്. ദില്‍ രാജു ആണ് ചിത്രം നിര്‍മ്മിക്കുന്നത്. തെലുങ്ക് സിനിമകള്‍ മാത്രം പ്രദര്‍ശിപ്പിക്കാന്‍ തീരുമാനം എടുത്ത കൗണ്‍സിലില്‍ ദില്‍ രാജു അംഗമായതിനാല്‍ വാരിസിന്റെ തെലുങ്ക് പ്രദര്‍ശനം മുടങ്ങാനാണ് സാധ്യത.
സിനിമയുടെ റിലീസ് തിയതി മാറ്റാന്‍ സാധ്യതയുണ്ടെന്ന അഭ്യൂഹമാണ് ഇപ്പോള്‍ പ്രചരിക്കുന്നത്. ഇതോടെ വിജയ് ആരാധകര്‍ നിരാശരായിരിക്കുകയാണ്. എന്നാല്‍ ജനുവരി 26ന് വാരിസ് എത്തുമെന്ന സൂചനകളുമുണ്ട്. രശ്മിക മന്ദാനയാണ് വാരിസില്‍ നായികയായി എത്തുന്നത്.
പ്രഭു, ജയസുധ, ശരത്കുമാര്‍, ഖുശ്ബു, മീന, ഷാം, പ്രകാശ് രാജ്, എസ്.ജെ സൂര്യ, യോഗി ബാബു എന്നിവരും ചിത്രത്തില്‍ വേഷമിടുന്നുണ്ട്. രണ്ട് പോസ്റ്ററുകള്‍ മാത്രമാണ് വാരിസിന്റെതായി പുറത്തുവിട്ടിട്ടുള്ളത്. കൂടുതല്‍ അപ്‌ഡേറ്റുകള്‍ക്കായാണ് ആരാധകര്‍ കാത്തിരിക്കുന്നത്.