തമിഴകത്ത് വന്‍ വിജയമായി മാറി വിജയ് സേതുപതി ചിത്രം ‘മഹാരാജ’. ചിത്രം 80 കോടിക്ക് മുകളില്‍ തിയേറ്ററുകളില്‍ നിന്നും നേടിക്കഴിഞ്ഞു എന്നാണ് റിപ്പോര്‍ട്ടുകള്‍. 10 ദിവസത്തിനുള്ളിലാണ് ചിത്രം 80 കോടിക്ക് മുകളില്‍ കളക്ഷന്‍ നേടിയിരിക്കുന്നത്. തമിഴ്‌നാട്ടില്‍ നിന്നും മാത്രം ചിത്രം 37 കോടിയോളം രൂപയാണ് നേടിയത്.
വിജയ് സേതുപതിയുടെ കരിയറിലെ ഏറ്റവും മികച്ച പെര്‍ഫോമന്‍സാണ് മഹാരാജയിലൂടെ കാഴ്ച്ച വച്ചിരിക്കുന്നത് എന്നാണ് പ്രേക്ഷകരുടെ അഭിപ്രായം. ഇതിനിടെ സിനിമയ്ക്കായി നടന്‍ വാങ്ങിയ പ്രതിഫലവും ചര്‍ച്ചയാകുന്നുണ്ട്. 20 കോടിയാണ് സേതുപതിക്ക് ചിത്രത്തിനായി വാഗ്ദാനം ചെയ്തിരുന്ന പ്രതിഫലം.
എന്നാല്‍ ഇത് താരം വാങ്ങിയിട്ടില്ലെന്നും അഡ്വാന്‍സ് തുക മാത്രമാണ് കൈപറ്റിയിരിക്കുന്നത് എന്നുമാണ് റിപ്പോര്‍ട്ടുകള്‍. നിഥിലന്‍ സ്വാമിനാഥന്‍ സംവിധാനം ചെയ്ത മഹാരാജ സസ്‌പെന്‍സ് ത്രില്ലര്‍ വിഭാഗത്തിലൊരുങ്ങുന്ന ചിത്രമാണ്. പാഷന്‍ സ്റ്റുഡിയോസിന്റെയും ദ റൂട്ടിന്റെയും ബാനറില്‍ സുദന്‍ സന്ദരവും ജഗദീഷ് പളനിസ്വാമിയുമാണ് ചിത്രം നിര്‍മ്മിച്ചത്.
അഭിരാമി, അരുള്‍ ദോസ്, മുനിഷ്‌കാന്ത്, ബോയ്‌സ് മണികണ്ഠന്‍, സിങ്കം പുലി, ഭാരതിരാജ, വിനോദ് സാഗര്‍, പി എല്‍ തേനപ്പന്‍ എന്നിവരോടൊപ്പം അനുരാഗ് കശ്യപ്, മംമ്ത മോഹന്‍ദാസ്, നട്ടി നടരാജ് എന്നിവരും പ്രധാന വേഷങ്ങളില്‍ അഭിനയിക്കുന്നു.