വിനായകനെ നായകനാക്കി ടോം ഇമ്മട്ടി സംവിധാനം ചെയ്യുന്ന പുതിയ ചിത്രം പ്രഖ്യാപിച്ചു. ‘പെരുന്നാള്‍’ എന്നാണ് ചിത്രത്തിന്റെ പേര്. ‘ക്രോവേന്മാരും സ്രാപ്പേന്‍മാരും’ എന്ന ടാഗ് ലൈനോടെയാണ് ചിത്രത്തിന്റെ അനൗണ്‍സ്‌മെന്റ് പോസ്റ്റര്‍ എത്തിയിരിക്കുന്നത്.
ജോളിവുഡ് മൂവീസും ഇമ്മട്ടി കമ്പനിയും ചേര്‍ന്നാണ് പെരുന്നാളിന്റെ നിര്‍മ്മാണം. ടോവിനോ തോമസ് നായകനായ ഒരു മെക്‌സിക്കന്‍ അപാരത, ആന്‍സണ്‍ പോള്‍ നായകനായ ദ ഗ്യാംബ്ലര്‍ എന്നീ ചിത്രങ്ങള്‍ക്ക് ശേഷം ടോം ഇമ്മട്ടി സംവിധാനം ചെയ്യുന്ന ചിത്രമാണിത്.
ചിത്രത്തിന്റെ പ്രഖ്യാപനത്തോടൊപ്പം പുതുമുഖങ്ങള്‍ക്ക് അവസരം നല്‍കുന്ന കാസ്റ്റിങ് കോളും അണിയറപ്രവര്‍ത്തകര്‍ പുറത്തുവിട്ടിട്ടുണ്ട്. അഞ്ചിനും പതിനഞ്ചിനും ഇടയിലുള്ള ആണ്‍/പെണ്‍ കുട്ടികള്‍ക്കും ഇരുപതിനും മുപ്പത്തി അഞ്ചിനും നാല്‍പതിനും എഴുപതിനുമിടയിലുള്ള സ്ത്രീ/പുരുഷന്മാര്‍ക്കും ചിത്രത്തില്‍ അഭിനയിക്കാനായുള്ള അവസരം ഒരുങ്ങുകയാണ്.
അഭിനയിക്കാന്‍ താല്‍പര്യമുള്ളവര്‍ എഡിറ്റ് ചെയ്യാത്ത രണ്ട് ഫോട്ടോയും മുപ്പത് സെക്കന്റ് ദൈര്‍ഘ്യമുള്ള പെര്‍ഫോമന്‍സ് വീഡിയോയും നവംബര്‍ 11ന് മുന്നേ perunnalmovie@gmail.com എന്ന ഇമെയില്‍ ഐഡിയില്‍ അയക്കണം. പിആര്‍ഒ ആന്‍ഡ് മാര്‍ക്കറ്റിംഗ് കണ്‍സല്‍ട്ടന്റ്: പ്രതീഷ് ശേഖര്‍.