പന്ത്രണ്ട് വര്‍ഷത്തിന് ശേഷം തിയേറ്ററുകളിലെത്തിയ വിശാലിന്റെ ‘മദ ഗജ രാജ’ തമിഴകത്ത് സൂപ്പര്‍ ഹിറ്റ്. 2013ല്‍ റിലീസ് ചെയ്യേണ്ട ചിത്രമാണ് 2025 ജനുവരി 12ന് തിയേറ്ററുകളിലെത്തിയത്. നാല് ദിവസം കൊണ്ട് 24 കോടി രൂപയാണ് ചിത്രം നേടിയ കളക്ഷന്‍. മദ്രാസ്‌കാരന്‍, വണങ്കാന്‍, കാതലിക്ക നേരമില്ലൈ, നേസിപ്പായ, തരുണം തുടങ്ങി ഒന്നിച്ചെത്തിയ സിനിമകളെയെല്ലാം ബോക്‌സ് ഓഫീസില്‍ ഒതുക്കികൊണ്ടാണ് മദ ഗജ രാജയുടെ കുതിപ്പ്.
വിശാല്‍-സന്താനം ടീമിന്റെ കോമഡി നമ്പറുകളാണ് സിനിമയുടെ പ്രധാന ആകര്‍ഷണം. അഞ്ജലിയും വരലക്ഷ്മിയുമാണ് നായികമാര്‍. അതേസമയം, 2012ല്‍ ചിത്രീകരണം പൂര്‍ത്തിയായ സിനിമയായിരുന്നു മദ ഗജ രാജ. 2013ല്‍ പൊങ്കല്‍ റിലീസ് ആയി പുറത്തിറക്കാനിരുന്നെങ്കിലും വിശാലിന്റെ തന്നെ ‘സമര്‍’ എന്നൊരു സിനിമ ആയിരുന്നു എത്തിയത്.
പിന്നീട് സെപ്റ്റംബറില്‍ റിലീസ് ചെയ്യാമെന്ന് തീരുമാനിച്ചെങ്കിലും ഓസ്‌ട്രേലിയന്‍ പൗരനായ സന്താനം എന്നൊരാള്‍ നിര്‍മാണക്കമ്പനിക്കെതിരെ കേസ് കൊടുത്തതോടെ സിനിമയുടെ റിലീസ് പ്രതിസന്ധിയിലായി. ഈ പ്രശ്‌നം മറച്ചുവച്ച് ജെമിനി ഫിലിം സര്‍ക്യൂട്ട് എന്ന കമ്പനി ചിത്രം വിശാലിന്റെ നിര്‍മാണക്കമ്പനിക്ക് വിറ്റിരുന്നു. എന്നാല്‍ സാമ്പത്തിക പ്രതിസന്ധികളാല്‍ റിലീസ് ചെയ്യാനായില്ല.
ഒടുവില്‍ 12 വര്‍ഷത്തിന് ശേഷം ചിത്രം തിയേറ്ററുകളിലെത്തി. സുന്ദര്‍ സി സംവിധാനം ചെയ്ത ചിത്രത്തിന് മികച്ച പ്രതികരണങ്ങളാണ് ലഭിച്ചു കൊണ്ടിരിക്കുന്നത്. കഴിഞ്ഞ വര്‍ഷം തകര്‍ച്ചയുടെ വക്കിലെത്തിയ കോളിവുഡിന് പ്രതീക്ഷയേകി സുന്ദര്‍ സിയുടെ അരണ്‍മനൈ 4 തിയേറ്ററിലെത്തിയിരുന്നു. 2024ലെ ഏറെ കളക്ഷന്‍ നേടിയ ചിത്രങ്ങളില്‍ ഒന്നായി ഈ സിനിമ മാറിയിരുന്നു.
ഈ വര്‍ഷത്തെ പൊങ്കലിന് വീണ്ടും തിയേറ്ററുകള്‍ നിറച്ചിരിക്കുകയാണ് സുന്ദറിന്റെ സിനിമ. സോനു സൂദ്, നിതിന്‍ സത്യ എന്നിവരാണ് മദ ഗജ രാജയിലെ മറ്റു അഭിനേതാക്കള്‍. വിജയ് ആന്റണി ആണ് സിനിമയ്ക്കായി സംഗീതം ഒരുക്കിയത്. സിനിമയുടെ ഛായാഗ്രഹണം നിര്‍വഹിച്ചത് റിച്ചാര്‍ഡ് എം നാഥന്‍ ആണ്.
