മാധ്യമസ്ഥാപനങ്ങള്‍ക്കും മാധ്യമപ്രവര്‍ത്തകര്‍ക്കും നേരെയുള്ള നിരന്തരമായ ആക്രമണങ്ങളില്‍ അപലപിക്കുന്നുവെന്ന് ഡബ്ല്യൂസിസി. റിപ്പോര്‍ട്ടര്‍ ടിവി എഡിറ്റര്‍ നികേഷ് കുമാറിനെതിരെ ദിലീപ് നല്‍കിയ പരാതിയില്‍ പൊലീസ് കേസെടുത്ത പശ്ചാത്തലത്തിലും മീഡിയാവണ്ണിന്റെ സംപ്രേഷണം തടഞ്ഞ സാഹചര്യത്തിലുമാണ് ഡബ്ല്യുസിസിയുടെ പ്രതികരണം
”മാധ്യമസ്ഥാപനങ്ങള്‍ക്കും മാധ്യമപ്രവര്‍ത്തകര്‍ക്കും നേരെയുള്ള നിരന്തരമായ ആക്രമണങ്ങളിലൂടെ സുതാര്യതയ്ക്കും വിവരത്തിനുമുള്ള പൊതുജനങ്ങളുടെ അവകാശത്തെ തടസ്സപ്പെടുത്തുന്നതിനെ ഡബ്ല്യൂസിസി ശക്തമായി അപലപിക്കുന്നു. ഡബ്ല്യൂസിസി എന്നും ധാര്‍മ്മികവും പക്ഷപാതരഹിതവുമായ മാധ്യമപ്രവര്‍ത്തനത്തിനൊപ്പം!” എന്നാണ് സംഘടനയുടെ കുറിപ്പ്.
നടി ആക്രമിക്കപ്പെട്ട കേസിലെ നിയമനടപടികള്‍ ചര്‍ച്ച ചെയ്ത റിപ്പോര്‍ട്ടര്‍ ടിവിക്കും നികേഷ് കുമാറിനും എതിരെ ദിലീപ് ഹൈക്കോടതിയില്‍ സമര്‍പ്പിച്ച ഹര്‍ജിയിലാണ് പൊലീസ് കേസെടുത്തത്. ഹര്‍ജിയില്‍ അന്വേഷണം നടത്തി റിപ്പോര്‍ട്ട് സമര്‍പ്പിക്കാനാണ് ഹൈക്കോടതി ഡിജിപിയോട് ആവശ്യപ്പെട്ടത്.
എന്നാല്‍ റിപ്പോര്‍ട്ട് സമര്‍പ്പിക്കാതെ പൊലീസ് നികേഷ് കുമാറിനെതിരെയും ചാനലിനെതിരെയും സ്വമേധയാ കേസെടുക്കുകയായിരുന്നു. അതേസമയം സുരക്ഷാ കാരണങ്ങള്‍ ഉന്നയിച്ചാണ് കേന്ദ്രം മീഡിയാവണ്‍ ചാനലിന്റെ സംപ്രേക്ഷണം തടഞ്ഞത്.