സിനിമയിലെ ഒരു രംഗത്തിന്റെ യാഥാര്‍ത്ഥ്യതയ്ക്ക് വേണ്ടി താന്‍ ചത്ത കഴുകനെ കടിച്ചു പറിച്ചിട്ടുണ്ടെന്ന് ഹോളിവുഡ് താരം അര്‍നോള്‍ഡ് ഷ്വാസ്‌നെഗര്‍. ‘ബീ യൂസ്ഫുള്‍: സെവന്‍ ടൂള്‍സ് ഫോര്‍ ലൈഫ്’ എന്ന പുസ്തകത്തിലാണ് അര്‍നോള്‍ഡ് ഇക്കാര്യം വെളിപ്പെടുത്തിയിരിക്കുന്നത്.
‘കോനന്‍ ദ ബാര്‍ബേറിയന്‍’ എന്ന ചിത്രത്തിലാണ് ഇങ്ങനൊരു രംഗം ചിത്രീകരിച്ചത്. ആ രംഗം ഒക്കെ ആക്കാനായി ചത്ത കഴുകനെ പലതവണ കടിക്കേണ്ടി വന്നിട്ടുണ്ട് എന്നാണ് അര്‍നോള്‍ഡ് പറയുന്നത്. ജോലിയോടുള്ള ആത്മാര്‍ത്ഥത കാരണം ആ വേദനാജനകമായ പ്രവൃത്തി ചെയ്തു.
ഓരോ ടേക്കിന് ശേഷവും മദ്യം ഉപയോഗിച്ച് വായ കഴുകി എന്നും അര്‍നോള്‍ഡ് വ്യക്തമാക്കി. ഇത് മാത്രമല്ല, കോനന്‍ ദ ബാര്‍ബേറിയന്‍ എന്ന ചിത്രത്തിന്റെ തന്നെ ഷൂട്ടിംഗിനിടെ സ്റ്റണ്ട് രംഗങ്ങള്‍ സ്വാഭാവികതയോടെ ചെയ്തപ്പോള്‍ 40 തുന്നലുകള്‍ ഇടേണ്ടി വന്നിട്ടുണ്ടെന്നും താരം വെളിപ്പെടുത്തി.
അക്കാലത്ത് നല്ല സ്റ്റണ്ട് ഡ്യൂപ്പുകള്‍ ഇല്ലാതിരുന്നതിനാല്‍ കാല്‍മുട്ടുകളിലേയും കൈമുട്ടുകളിലേയും തൊലി ഇളകുന്നതുവരെ ഇഴഞ്ഞു പോകും വിധമുള്ള രംഗങ്ങളില്‍ അഭിനയിക്കാന്‍ നിര്‍ബന്ധിതനായിരുന്നു. ‘ദ സിക്‌സ്ത് ഡേ’ എന്ന ചിത്രത്തിന്റെ ഷൂട്ടിംഗിനിടെ സ്വിമ്മിങ് പൂളില്‍ നീന്തുന്ന ഒരു രംഗമുണ്ടായിരുന്നു.
പക്ഷേ ആ കുളത്തിന് ഒരു കവര്‍ ഉണ്ടായിരുന്നു. നീന്താന്‍ തുടങ്ങിയ അതേ സ്ഥലത്തു തന്നെ എത്തിയാല്‍ മതിയായിരുന്നു. പക്ഷേ തനിക്ക് ശ്വാസം കിട്ടാതെയായി. എന്നാല്‍ ഭാഗ്യവശാല്‍ സ്റ്റണ്ട് ഡബിള്‍ ആയ ബില്ലി ലൂക്കാസ് വരാനിരിക്കുന്ന അപകടം തിരിച്ചറിഞ്ഞ് രക്ഷപ്പെടുത്തുകയായിരുന്നു എന്നും ഷ്വാസ്‌നെഗര്‍ വ്യക്തമാക്കി.