ഹോളിവുഡ് നടന്‍ ക്രിസ്റ്റ്യന്‍ ഒലിവറിന്റെയും പെണ്‍മക്കളുടേയും അപ്രതീക്ഷിത വിയോഗത്തിന്റെ ഞെട്ടലില്‍ ആരാധകര്‍. കുടുംബത്തിനൊപ്പം അവധിക്കാലം ആഘോഷിക്കുന്നതിനിടെയാണ് ക്രിസ്റ്റിയന്‍ ഒലിവറെയും പെണ്‍മക്കളെയും മരണം കവര്‍ന്നത്. വ്യാഴാഴ്ച കരീബിയിന്‍ ദ്വീപിന്റെ തീരത്താണ് അപകടമുണ്ടായത്.
ടേക്ക് ഓഫിന് തൊട്ടുപിന്നാലെ വിമാനം കടലില്‍ തകര്‍ന്നു വീഴുകയായിരുന്നു. താരത്തിന്റെ അവസനാത്തെ ഇന്‍സ്റ്റഗ്രാം പോസ്റ്റ് സോഷ്യല്‍ മീഡിയയില്‍ ചര്‍ച്ചയാവുകയാണ്. കരീബിയന്‍ ദ്വീപില്‍ മനോഹരമായ സായാഹ്നം ആസ്വദിക്കുന്നതിന്റെ ചിത്രമാണ് ഒലിവര്‍ അവസാനമായി പങ്കുവച്ചത്.
ഭാര്യയെയും മക്കളെയും ചിത്രത്തില്‍ കാണാം. ‘പറുദീസയില്‍ എവിടെ നിന്നോ ആശംസകള്‍, സമൂഹത്തിലേക്കും സ്‌നേഹത്തിലേക്കും, 2024, ഇതാ ഞങ്ങള്‍ വരുന്നു’ എന്നാണ് ചിത്രത്തിന് നടന്‍ നല്‍കിയിരുന്ന ക്യാപ്ഷന്‍. നിരവധി ആരാധകരാണ് താരത്തിന്റെ പോസ്റ്റിന് കമെന്റുമായി എത്തുന്നത്.
ഒലിവറിന്റെ മക്കളായ മെഡിറ്റ (10), അനിക് (12) എന്നിവരാണ് മരിച്ചത്. വിമാനത്തിന്റെ പൈലറ്റ് റോബര്‍ട്ട് ഷാസും അപകടത്തില്‍ മരിച്ചിരുന്നു. അപകടം നടന്ന ഉടനെ മത്സ്യത്തൊഴിലാളികളും കോസ്റ്റ് ഗാര്‍ഡും സ്ഥലത്ത് എത്തിയെങ്കിലും വിമാനത്തിലുണ്ടായിരുന്ന ആരുടെയും ജീവന്‍ രക്ഷിക്കാന്‍ സാധിച്ചില്ല.
അറുപതിലേറെ സിനിമകളിലും ടിവി ഷോകളിലും ക്രിസ്റ്റ്യന്‍ ഒലിവര്‍ വേഷമിട്ടിട്ടുണ്ട്. 2008ല്‍ പുറത്തിറങ്ങിയ ആക്ഷന്‍ കോമഡി ചിത്രമായ ‘സ്പീഡ് റേസറി’ലൂടെയാണ് താരം ശ്രദ്ധ നേടിയത്. 2006ല്‍ പുറത്തിറങ്ങിയ ‘ദ് ഗുഡ് ജര്‍മന്‍’ എന്ന ചിത്രത്തിലൂടെയാണ് ക്രിസ്റ്റ്യന്‍ ഒലിവര്‍ ആദ്യമായി ബിഗ് സ്‌ക്രീനില്‍ പ്രത്യക്ഷപ്പെട്ടത്.