Connect with us

MOVIE REVIEW

സൗന്ദര്യ പരിപ്രേക്ഷ്യങ്ങളുടെ മാറ്റിയെഴുത്തുമായി ‘ദ് ഷേപ്പ് ഓഫ് വാട്ടര്‍’

, 8:22 pm

ജോമോന്‍ തിരു

ചിത്രകഥകളായും കഥപറച്ചിലുകാരുടെ താളവ്യത്യാസങ്ങളിലായും നൃത്തമായും സംഗീതമായും സ്റ്റേജിലും സ്‌ക്രീനിലുമെല്ലാം നിറഞ്ഞാടിയ ‘The Beauty and the Beast’ എന്ന ഫ്രഞ്ച ഫെയറിടെയിലിന്റെ രൂപകത്തില്‍ ‘സൗന്ദര്യം’ എന്ന ഏറ്റവും ആത്മനിഷ്ഠമായ, മാനുഷികമൂല്യങ്ങളുടെയും വലിപ്പച്ചെറുപ്പങ്ങള്‍ നിശ്ചയിക്കുന്ന ഒന്നിനെ, ഒരു ചിത്രകാരന്റെ ഭാവാത്മകതയില്‍, ഒരു ശില്പിയുടെ കരവിരുതില്‍, ഒരു സംഗീതജ്ഞന്റെ കാവ്യാത്മകതയില്‍ Guillermo del Toro വ്യാഖ്യാനിക്കുന്ന, അളന്നുമുറിക്കുന്ന, ആഘോഷമാക്കുന്ന ചിത്രമാണ് ‘The Shape Of Water.’ അറുപതുകളിലെ കോള്‍ഡ് വാര്‍ കാലഘട്ടത്തിലാണ് സിനിമ അവതരിപ്പിക്കപ്പെടുന്നത്. സ്റ്റേറ്റ് രഹസ്യമായി നടത്തിവരുന്ന ഒരു ലബോറട്ടറിയില്‍ പരിപാലകയാണ് എലീസ എന്ന കേന്ദ്രകഥാപാത്രം. മൂകയായ എലീസ, അവള്‍ക്കുചുറ്റുമുള്ള ചെറിയ ലോകത്തെക്കുറിച്ചുള്ള കൗതുകത്താല്‍, തന്റെ വിരസജീവിതത്തോടുള്ള മടുപ്പിനാല്‍ എല്ലാത്തിനോടും ഒരു എക്‌സൈറ്റ്‌മെന്റ് സൂക്ഷിക്കുന്നവളാണ്. അങ്ങനെയിരിക്കെ സ്റ്റേറ്റ് പരീക്ഷണത്തിനായി കൊണ്ടുവരുന്ന ഒരു ഉഭയജീവിയില്‍ ആകൃഷ്ടയാകുന്ന എലീസ അതുമായി വിനിമയം ചെയ്യുവാന്‍ ശ്രമിക്കുകയും വിജയിക്കുകയും ചെയ്യുന്നു. അവര്‍ക്കിടയില്‍ വളര്‍ന്നുവരുന്ന ബന്ധത്താല്‍ ഈ ജീവിയെ രക്ഷപ്പെടുത്തുവാന്‍ എലീസ ശ്രമിക്കുന്നതും അനുബന്ധസംഭവങ്ങളുമാണ് ചിത്രം പറയുന്നത്.

സാലി ഹാവ്കിന്‍സ് അവതരിപ്പിച്ച എലീസ എന്ന കഥാപാത്രമാണ് ചിത്രത്തിന്റെ കേന്ദ്രബിന്ദു. ഒരു നദിയില്‍ നിന്നും കിട്ടിയ, ജന്മനാ മൂകയായ, അനാഥയായ ഒരുവള്‍. തന്റെ വൈകല്യത്തിന്റെ ഫലമായി എല്ലാവരില്‍ നിന്നും അനുതാപം ഏറ്റുവാങ്ങേണ്ടിവന്ന, ‘താന്‍’ എന്ന ഐഡന്റിറ്റി ഈ സഹാനുഭൂതിയില്‍ ഇല്ലാതാവുന്നത് അനുഭവിക്കേണ്ടിവന്ന, വളരെ വിരസമായ ദിനചര്യകളിലേക്ക് കൂപ്പുകുത്തേണ്ടിവന്ന കഥാപാത്രമാണ് എലീസ. ആരോരുമില്ലായ്മയുടെ മടുപ്പുനികത്തുവാന്‍ വേണ്ടി അയല്‍ക്കാരനായ ഗിലീസിന് മകളെപോലെയാവുകയും ടെലിവിഷനില്‍ കാണുന്ന നൃത്തത്തിലും രാവെളിച്ചങ്ങളിലും താന്‍ ജോലിചെയ്യുന്ന ലബോറട്ടറിയുടെ രഹസ്യങ്ങളിലും അഭിരമിക്കുവാന്‍, അതുവഴിയെങ്കിലും താനായി നിലനില്‍ക്കുവാന്‍ ആഗ്രഹിക്കുന്നവളാണ് അവള്‍. എലീസയാല്‍ പ്രേക്ഷകനില്‍ ജനിക്കുന്ന എംപതിയാണ് ചിത്രത്തിന്റെ ആത്മാവായി കണക്കാക്കുവാന്‍ കഴിയുക. ‘Disabled’ എന്ന ‘ബ്യൂട്ടിലെസ്സ്’ സ്റ്റേറ്റ് അല്ല, മറിച്ച് ഓരോ ആംഗ്യങ്ങളിലൂടെയും എലീസ നേടിയെടുക്കുന്ന വാത്സല്യം, അവള്‍ സ്വയം കണ്ടെത്തുവാന്‍ ആഗ്രഹിക്കുന്നതോ നേടിയെടുക്കുന്നതോ ആയ ഒരു ചിരി തുടങ്ങിയവയിലൂടെയാണ് ചിത്രവും, അതിന്റെ ആഴവും ആരംഭിക്കുന്നത്.

ആന്തരിക സൗന്ദര്യത്താല്‍, വശ്യയായ രാജകുമാരിയെ വിജയിച്ച് ശാപമോക്ഷം നേടുന്ന മൃഗരാജാവിന്റെ വീരഗാഥയാണ് അടിസ്ഥാന രൂപകമെങ്കിലും ‘Beauty’ എന്നതിനെ മൂകയായ, വിരസയായ, ഒറ്റപ്പെട്ടവളായ ഒരുവളുടെ ജീവിതത്തിലൂടെ നോക്കികാണുവാനാണ് ചിത്രം ശ്രമിക്കുന്നത്. സൗന്ദര്യത്തെ മൂല്യവത്കരിക്കുന്നതിനാല്‍ അലാറാം സെറ്റ് ചെയ്ത് സ്വയംഭോഗം ചെയ്യേണ്ടിവരുന്നത്ര ഒറ്റപ്പെടുന്ന, പ്രണയത്തിലും രതിയിലും അവഗണിക്കപ്പെടുന്ന, വിഷാദത്തിനപ്പുറം ജീവിതാര്‍ത്ഥങ്ങളുടെ ആഴമില്ലായ്മ തിരിച്ചറിയുന്ന മൂകയായ, കുറവുകള്‍ ഏറെയുള്ള ‘രാജകുമാരിയാണ്’ ചിത്രത്തിലെ നായിക. അവള്‍ക്കാണ് കാമുകനായിമാറുന്ന ഒരു ഉഭയജീവി ശാപമോക്ഷമരുളുന്നത്. നായികയുടെ വാക്കുകള്‍ കടമെടുത്താല്‍ ‘അത് അവളെ’ കാണുന്നുണ്ട്. അവളുടെ ഇല്ലായ്മകളുടെയും കുറവുകളുടെയും മൂടുപടങ്ങള്‍ ഇല്ലാതെ അത് അവളെ മാത്രമാണ് കാണുന്നത്. അത്രയും ലളിതമായാണ്, ലാളിത്യത്തോടെയാണ്, ‘It’ എന്നത് ‘Him’ ആവുന്നിടത്ത് അത് പ്രൊപ്പഗേറ്റ് ചെയ്യുന്ന, ചലഞ്ച് ചെയ്യുന്ന, മാറ്റിയെഴുതുന്ന Perceptions തുറന്നുകാട്ടിയാണ് Guillermo സൗന്ദര്യത്തിന്റെ പഴകിത്തെളിഞ്ഞ കാവ്യങ്ങളെ മാറ്റിയെഴുതുന്നത്. വലിപ്പച്ചെറുപ്പങ്ങള്‍ തീര്‍ക്കുന്ന ഗാഥകളേക്കാള്‍ വളരെ ബാലന്‍സ്ഡായാണ് സൗന്ദര്യത്തിന്റെ രാഷ്ട്രീയത്തെ ഇതുവഴി സംവിധായകന്‍ അവതരിപ്പിക്കുന്നത്.

Pan’s Labyrinth പോലെ പൊളിറ്റിക്കല്‍ സബ്ടെക്സ്റ്റുകള്‍ ഈ ചിത്രത്തിലും ഉള്‍പ്പെടുത്തുവാന്‍ Guillermo മറക്കുന്നില്ല. അമേരിക്കയ്ക്കും റഷ്യയ്ക്കും ഇടയിലുണ്ടായിരുന്ന ശീതയുദ്ധത്തിന്റെ പശ്ചാത്തലത്തില്‍ കണ്ടെടുക്കപ്പെടുന്ന ഉഭയജീവിയെ തങ്ങള്‍ക്ക് ഉപയോഗിക്കുവാന്‍ കഴിയുമോയെന്നുള്ള ശ്രമം ആരംഭിക്കുകയും ഇല്ലെന്ന സാഹചര്യത്തില്‍ അതിനെ ഒരു Intruder ആയിക്കണ്ട് ഒഴിവാക്കാനാണ് അവര്‍ ശ്രമിക്കുന്നത്. Intruder എന്നതിനെ ഒരു ഓപ്പണ്‍ വാക്ക്വം ആയി കണ്‍സീവ് ചെയ്യുവാന്‍ സംവിധായകന്‍ ശ്രമിക്കുന്നുണ്ട്. ഇന്ന് സമൂഹം ഒരു ഇന്‍ട്രൂഡര്‍ ആയിമാത്രം സമീപിക്കുന്ന എന്തിനെയും, ആരെയും ഒരു നാണയത്തിന്റെ രണ്ട് വശങ്ങളും (ചിത്രത്തില്‍ അധികാരത്തിന്റെ രണ്ട് വശങ്ങളായ രാജ്യങ്ങള്‍ ആണെന്നുമാത്രം) തിരസ്‌ക്കരിക്കുന്നുണ്ടെന്ന് അടയാളപ്പെടുത്തുന്നുണ്ട് സംവിധായകന്‍. ഇന്ന് നിലനില്‍ക്കുന്ന സ്ത്രീത്വത്തിന്റെ, കറുത്തവരുടെ, ലൈംഗിക ന്യൂനപക്ഷങ്ങളുടെ, അഭയാര്‍ഥികളുടെ ഒക്കെ പ്രതിനിധിയായി തീരുവാന്‍ known-identity-ക്ക്പ്പുറം ഉപയോഗിക്കപ്പെടുവാനും ഇല്ലാതാക്കപ്പെടുവാനും വിധിക്കപ്പെട്ട ചിത്രത്തിലെ ആംഫിബിയന് ആവുന്നുണ്ട് എന്നത് സംവിധായകനായ Guillermo del Toro-യുടെ മിടുക്കാണ്.

സംവിധായകന്റെ ക്രാഫ്റ്റിനപ്പുറം ചിത്രത്തെ ജീവിപ്പിക്കുന്നത് എലൈസ എന്ന കഥാപാത്രത്തെ അവതരിപ്പിച്ച Sally Hawkinsഉം സംഗീതം നിര്‍വ്വഹിച്ച Alexandre Desplat-ന് ആണ്. സംസാരശേഷിയില്ലാത്ത എലൈസയുടെ ജീവിതത്തിന് ആന്തരികമായ താളം തീര്‍ക്കുവാന്‍, പൂര്‍ണ്ണത വരുത്തുവാന്‍ ഹോക്കിന്‍സിന്റെ അഭിനയമികവും ഡെസ്പ്ലാറ്റിന്റെ മന്ത്രികസംഗീതവും ഒരുപോലെ വിനയോഗിക്കപ്പെടുന്നുണ്ട്. ക്രൂഷ്യല്‍ ആയ പലസന്ദര്‍ഭങ്ങളും പ്രേക്ഷകനിലേക്കെത്തുന്നത് ഇവ രണ്ടിന്റെയും തത്തുല്യമായ അവതരണത്തിലാണ്. കേവലം ചിത്രത്തിന്റെ പശ്ചാത്തലസംഗീതം ആവുക എന്നതിനേക്കാള്‍ എലൈസയുടെ ‘ഡിസബിലിറ്റി’ ഇല്ലാതാക്കുകയാണ് ഡെസ്പ്ലാറ്റിന്റെ സംഗീതം ചെയ്യുന്നത്. അറുപതുകളുടെ സെറ്റിങ്ങില്‍ രാത്രിദൃശ്യങ്ങള്‍ കൂടുതല്‍ മനോഹരമാവുകയും സംവിധായകന്റെ എലഡന്‍സ് തുടരുകയും ചെയ്യുന്നുണ്ട്. എല്ലാം പ്രതിധ്വനിക്കുന്ന സാലി ഹോക്കിന്‍സിന്റെ വശ്യമായ മുഖം ചിത്രത്തിന് പൂര്‍ണ്ണതയേകുന്നുണ്ട്.

വെനീസ് ചലച്ചിത്രമേളയില്‍ പ്രീമിയര്‍ ചെയ്ത്, ഗോള്‍ഡന്‍ ലയണ്‍ പുരസ്‌ക്കാരം നേടിയാണ് ചിത്രം പ്രേക്ഷകരുടേയും അനുവാചകരുടെയും ഇടയിലേക്ക് കടക്കുന്നത്. മിക്ക നിരൂപകപ്രസിദ്ധീകരണങ്ങളും പോയവര്‍ഷത്തെ ഒന്നാമതെന്ന് വിലയിരുത്തിയ ചിത്രം ഇന്ന് പ്രഖ്യാപിച്ച തൊണ്ണൂറാമത് ഓസ്‌കാര്‍ പുരസ്‌ക്കാരങ്ങളിലും, 13 നോമിനേഷനുകളില്‍ നിന്ന് 4 ജയങ്ങളോടെ മികവുപുലര്‍ത്തി. Paul Denham Austerberry, ടhane Vieau, Jeff Melvin എന്നിവര്‍ ബാള്‍ട്ടിമോര്‍ നഗരത്തിന്റെ അറുപതുകളുടെ ദൃശ്യങ്ങളിലേക്ക് ചിത്രത്തെ സ്ഥാപിച്ചുകൊണ്ട് പ്രൊഡക്ഷന്‍ ഡിസൈന്‍ കാറ്റഗറിയില്‍ ഓസ്‌ക്കാര്‍ നേടി. പകരംവെക്കാനില്ലാത്ത സംഗീതമികവിന് ബെസ്റ്റ് ഒറിജിനല്‍ സ്‌കോര്‍ വിഭാഗത്തില്‍ Alexandre Desplat-നും വിഭിന്നകലകളുടെ മൂര്‍ത്തീഭാവങ്ങള്‍ സിനിമയുടെ വിഷ്വലിന്റെ ചാരുതയില്‍ യോജിപ്പിച്ചതിന് മികച്ച സംവിധായക വിഭാഗത്തില്‍ Guillermo del Toroയും ഓസ്‌കാര്‍ പുരസ്‌ക്കാരം നേടി. Three Billboards Outside, Ebbing, Missouri, Dunkirk തുടങ്ങി എട്ട് ചിത്രങ്ങളെ പിന്നിലാക്കി മികച്ച ചിത്രത്തിനുള്ള പുരസ്‌ക്കാരവും ഇന്നത്തെ ഓസ്‌കാര്‍ നിശയില്‍ നേടിയെടുക്കുവാന്‍ The Shape Of Water-ന് കഴിഞ്ഞു. ഫാന്റസി ജനുസ്സില്‍ തന്നെ ഏറ്റവും കൂടുതല്‍ അംഗീകരിക്കപ്പെട്ടതിന്റെ വിജയമാണ് ‘The Shape Of Water’-നുള്ളത്. പോയവര്‍ഷത്തെ ഏറ്റവും മികച്ച ചിത്രമായി ‘The Shape Of Water’ മാറുന്നതും ചിത്രത്തിനകത്തും പുറത്തുമുള്ള ഈ വിജയങ്ങള്‍ കാരണമാണ്.