പൂര്‍ണഗര്‍ഭിണി ആയിരിക്കെ പ്രസവവേദന സഹിച്ചും പോപ് താരം ടെയ്ലര് സ്വിഫ്റ്റിന്റെ സംഗീത പരിപാടിയില്‍ പങ്കെടുത്ത് നൃത്തം ചെയ്ത് ആരാധിക. ഓസ്‌ട്രേലിയയിലെ മെല്‍ബണില്‍ ലോക സംഗീതപര്യടനത്തിന്റെ ഭാഗമായി ടെയ്ലര് സ്വിഫ്റ്റ് എത്തിയപ്പോഴാണ് ഈ സംഭവം. മൂന്ന് മണിക്കൂര്‍ നിന്നാണ് ടെയ്ലര് സ്വിഫ്റ്റിന്റെ ആരാധികയായ ജെന്‍ ഗുട്ടറസ് സംഗീതനിശ ആസ്വദിച്ചത്.
രണ്ട് മാസം മുമ്പ് നടന്ന സംഭവം ആരാധിക ജെന്‍ തന്നെയാണ് ഇപ്പോള്‍ വെളിപ്പെടുത്തിയിരിക്കുന്നത്. മണിക്കൂറുകളോളം സഞ്ചരിച്ചാണ് ഭര്‍ത്താവ് മൈക്കിള്‍സിനും ഇരട്ട സഹോദരി ഡാനിക്കുമൊപ്പം ജെന്‍ ഗുട്ടറസ് ടെയ്ലര് സ്വിഫ്റ്റിന്റെ സംഗീതപരിപാടി കാണാന്‍ മെല്‍ബണില്‍ എത്തിയത്.
കഴിഞ്ഞ വര്‍ഷം ആയിരുന്നു പരിപാടിയില്‍ പങ്കെടുക്കാനുള്ള ടിക്കറ്റുകള്‍ ജെന്‍ ബുക്ക് ചെയ്തത്. പ്രസവ ദിവസത്തോട് അടുത്താണ് പരിപാടിയെന്ന് അറിയാമായിരുന്നെങ്കിലും പൂര്‍ണ ഗര്‍ഭിണി ആയതിന്റെ പേരില്‍ അത് ഒഴിവാക്കാന്‍ ജെന്‍ ആഗ്രഹിച്ചില്ല.
താനും മകളും സുഖമായിരിക്കുന്നുവെന്നും ടെയ്ലറിന്റെ പാട്ട് കേള്‍ക്കുന്ന സമയത്ത് പ്രസവേദന അനുഭവപ്പെട്ടപ്പോള്‍ ഏറെ സന്തോഷം തോന്നിയെന്നും ജെന്‍ പ്രതികരിച്ചു. ലൈവ് പരിപാടി നടക്കുന്നതിന് ഇടയില്‍ കുഞ്ഞു പുറത്തുവരികയാണെങ്കില്‍ അങ്ങനെ സംഭവിക്കട്ടെയെന്ന നിലപാടിലായിരുന്നു താനെന്നും യുവതി പറഞ്ഞു.
പരിപാടി പാതി വഴിയില്‍ ഉപേക്ഷിച്ചു പോകാന്‍ തയാറല്ലായിരുന്നു. പരിപാടിക്ക് ശേഷം ഹോട്ടല്‍ മുറിയിലെത്തി വിശ്രമിച്ച യുവതി, അടുത്ത ദിവസമാണ് ആശുപത്രിയിലേക്ക് പോയത്. പൂര്‍ണ ആരോഗ്യവതിയായ ഒരു പെണ്‍കുഞ്ഞിനാണ് ജെന്‍ ജന്മം നല്‍കിയത്.