ലോകം മുഴുവനുമറിയുന്ന ഇന്ത്യയുടെ സ്വന്തം ഇതിഹാസം, അതായിരുന്നു ഉസ്താദ് സക്കീർ ഹുസ്സൈൻ. വിരൽത്തുമ്പിൽ സംഗീതത്തെ ഒളിപ്പിച്ചിരുന്ന അത്ഭുത പ്രതിഭ ഇനിയില്ല… അദ്ദേഹത്തിന്റെ വിരലുകൾ തബലയിൽ തീർക്കുന്ന വിസ്മയം നേരിട്ട് കണ്ടും കേട്ടും ആസ്വദിക്കാൻ വേണ്ടി മാത്രം ലോകത്തിന്റെ നാനാ ദിക്കുകളിൽ നിന്നും ആയിരങ്ങളായിരുന്നു ഒഴുകിയെത്തിയിരുന്നത്.
തൻ്റെ പിതാവും തബല ഇതിഹാസവുമായ ഉസ്താദ് അല്ലാ റഖയുടെ മാർഗനിർദേശപ്രകാരം മൂന്നാം വയസ്സിൽ തബല വായിക്കാൻ തുടങ്ങിയതാണ് സക്കീർ ഹുസ്സൈൻ. ഏഴാം വയസ്സിൽ തൻ്റെ ആദ്യത്തെ പൊതു പ്രകടനം നടത്തിയ അദ്ദേഹം വെറും 12 വയസ്സുള്ളപ്പോൾ, ആഗോളതലത്തിൽ ഇന്ത്യൻ ശാസ്ത്രീയ സംഗീതത്തെ പ്രതിനിധീകരിച്ച് അദ്ദേഹം തൻ്റെ ആദ്യ അന്താരാഷ്ട്ര കച്ചേരി പര്യടനം ആരംഭിച്ചു.
ഹീറ്റ് ആൻഡ് ഡസ്റ്റ്, ഇൻ കസ്റ്റഡി എന്നിവയുൾപ്പെടെയുള്ള ഐതിഹാസിക ചിത്രങ്ങൾക്ക് സംഗീതം നൽകിയ അദ്ദേഹം, സാസ്, അപരാജിതോ തുടങ്ങിയ ശ്രദ്ധേയമായ ബോളിവുഡ് പ്രോജക്ടുകളിലും പ്രവർത്തിച്ചിട്ടുണ്ട്. ആറ് പതിറ്റാണ്ട് നീണ്ട കരിയറിൽ, സക്കീർ ഹുസൈൻ ഇന്ത്യയിലെയും അന്തർദേശീയവുമായ നിരവധി പ്രശസ്ത കലാകാരന്മാരുമായി സഹകരിച്ചിട്ടുണ്ട്. ഇന്ത്യൻ ശാസ്ത്രീയ സംഗീതത്തിനപ്പുറം അദ്ദേഹം ഈസ്റ്റേൺ, വെസ്റ്റേൺ സംഗീത പാരമ്പര്യങ്ങൾ തമ്മിലുള്ള വിടവ് നികത്തിക്കൊണ്ട് ജോർജ്ജ് ഹാരിസൺ, ജോൺ മക്ലാഫ്ലിൻ, യോ-യോ മാ തുടങ്ങിയ അന്തർദേശീയ കലാകാരന്മാരുമായി സഹകരിച്ചിട്ടുണ്ട്.
ലോകമെമ്പാടുമുള്ള തൻ്റെ അധ്യാപനത്തിലൂടെയും ശിൽപശാലകളിലൂടെയും അടുത്ത തലമുറയിലെ തബല വാദകരെ പരിപോഷിപ്പിക്കുന്നതിൽ സക്കീർ ഹുസൈൻ ഭാഗമായിട്ടുണ്ട്. ഇന്ത്യയിൽ “നാഷണൽ ട്രഷർ” എന്ന പദവി നൽകി അദ്ദേഹത്തെ ആദരിക്കുകയും അദ്ദേഹം ഇന്ത്യൻ സംഗീതത്തിൻ്റെ സാംസ്കാരിക അംബാസഡറായി ആഗോളതലത്തിൽ അംഗീകരിക്കപ്പെടുകയും ചെയ്തിട്ടുണ്ട്.
1951 മാർച്ച് 9 ന് മഹാരാഷ്ട്രയിലാണ് ഉസ്താദ് സക്കീർ ഹുസൈൻ ജനിച്ചത്. മാഹിമിലെ സെൻ്റ് മൈക്കിൾസ് ഹൈസ്‌കൂളിൽ പ്രാഥമിക വിദ്യാഭ്യാസം പൂർത്തിയാക്കി. സംഗീതത്തിൽ മികവ് പുലർത്തുന്നതിനു പുറമേ, അദ്ദേഹം സാമ്പത്തിക ശാസ്ത്രത്തിലും ബിരുദം നേടിയിരുന്നു. സെൻ്റ് സേവ്യേഴ്‌സ് കോളേജിൽ നിന്നാണ് ബിരുദം നേടിയത്. ഇതിഹാസ തബല വാദകനായ അല്ലാ റഖയുടെ മൂത്ത മകൻ, സാക്കിർ ഹുസൈൻ തൻ്റെ പിതാവിൻ്റെ പാത പിന്തുടർന്നാണ് സംഗീതലോകത്തേക്ക് എത്തുന്നത്.
ഈ വർഷം ആദ്യം നടന്ന 66-ാമത് ഗ്രാമി അവാർഡുകളിൽ മൂന്ന് അവാർഡുകൾ ഉൾപ്പെടെ തൻ്റെ കരിയറിൽ ഉടനീളം ഹുസൈൻ അഞ്ച് ഗ്രാമി അവാർഡുകൾ നേടി. ഇന്ത്യയിലെ ഏറ്റവും പ്രശസ്തമായ ശാസ്ത്രീയ സംഗീതജ്ഞരിൽ ഒരാളായി കണക്കാക്കപ്പെടുന്ന ഹുസൈന് 1988-ൽ രാജ്യത്തെ പരമോന്നത സിവിലിയൻ ബഹുമതികളിലൊന്നായ പത്മശ്രീയും 2002-ൽ പത്മഭൂഷണും 2023-ൽ പത്മവിഭൂഷണും ലഭിച്ചു. മിക്കി ഹാർട്ടിനൊപ്പം പ്ലാനറ്റ് ഡ്രം എന്ന ആൽബത്തിൽ സഹകരിച്ചതിനും സാക്കിർ ഹുസൈൻ ഗ്രാമി അവാർഡ് നേടിയിട്ടുണ്ട്. ഇതോടെ ഈ ബഹുമതി നേടിയ ചുരുക്കം ചില ഇന്ത്യൻ സംഗീതജ്ഞരിൽ ഒരാളായി അദ്ദേഹം മാറി.
കഥക് നർത്തകിയും അധ്യാപികയുമായ അൻ്റോണിയ മിനക്കോളയെയാണ് ഹുസൈൻ വിവാഹം കഴിച്ചത്. ദമ്പതികൾക്ക് അനീസ ഖുറേഷി, ഇസബെല്ല ഖുറേഷി എന്നിങ്ങനെ രണ്ട് പെൺമക്കളുണ്ട്. 2024-ൽ അദ്ദേഹത്തിൻ്റെ ഏറ്റവും പുതിയ ചിത്രമായ മങ്കി മാൻ പുറത്തിറങ്ങി.
രക്തസമ്മർദ്ദവുമായി ബന്ധപ്പെട്ട കടുത്ത പ്രശ്‌നങ്ങൾ നേരിട്ടിരുന്നതായി നേരത്തെ വാർത്തകൾ ഉണ്ടായിരുന്നു. ഹൃദയ സംബന്ധമായ പ്രശ്‌നങ്ങൾ അനുഭവപ്പെട്ടതിനെ തുടർന്ന് സാൻ ഫ്രാൻസിസ്‌കോയിലെ ആശുപത്രിയിൽ പ്രവേശിപ്പിച്ച അദ്ദേഹം ലോകത്തോട് ഒടുവിൽ വിട പറയുകയായിരുന്നു.