‘ചന്ദ്രമുഖി 2’വിലെ കങ്കണ റണാവത്തിന്റെ ലുക്കും നൃത്തവും സോഷ്യല്‍ മീഡിയയില്‍ ശ്രദ്ധ നേടിയിരുന്നു. അതിനൊപ്പം തന്നെ വിമര്‍ശനങ്ങളും ഉയര്‍ന്നിരുന്നു. ചിത്രത്തിലേക്ക് കങ്കണ എത്തിയതിന് പിന്നിലെ കഥ പറഞ്ഞിരിക്കുകയാണ് സംവിധായകന്‍ പി. വാസു ഇപ്പോള്‍. മറ്റ് താരങ്ങളെ ആയിരുന്നു ആദ്യം നായികയായി തീരുമാനിച്ചത് എന്നാണ് സംവിധായകന്‍ പറയുന്നത്.
ചന്ദ്രമുഖി 2വിനായി രണ്ട് മൂന്ന് ആര്‍ട്ടിസ്റ്റുകളെ സമീപിച്ചിരുന്നു. അവര്‍ എന്ത് കാരണം കൊണ്ടാണ് നിരസിച്ചതെന്ന് അറിയില്ല. ഒരുപക്ഷെ ജ്യോതികയുമായി താരതമ്യം ചെയ്യപ്പെടുമോ, രണ്ടാം ഭാഗം എങ്ങനെയിരിക്കും എന്നൊക്കെ തോന്നിയിരിക്കാം. രണ്ട് പേരും വലിയ താരങ്ങളായിരുന്നു.
സിനിമ ചെയ്യുന്നില്ലെന്ന് മാനേജര്‍മാര്‍ മുഖേനെയാണ് അറിയിച്ചത്. നായികയെ തീരുമാനിക്കാത്തതിനാല്‍ ചന്ദ്രമുഖി ഇല്ലാത്ത ഭാഗങ്ങള്‍ ഷൂട്ട് ചെയ്തു. ആരായിരിക്കും ചന്ദ്രമുഖി എന്ന് അഭിനയിക്കുന്ന എല്ലാ ആര്‍ട്ടിസ്റ്റുകള്‍ക്കും ആകാംക്ഷ തോന്നി. പുതുമുഖങ്ങളെ കാസ്റ്റ് ചെയ്യാന്‍ ശ്രമിച്ചു. യാദൃശ്ചികമായാണ് കങ്കണയിലേക്ക് വരുന്നത്.
കങ്കണയ്ക്ക് വേണ്ടി മറ്റൊരു കഥ തയ്യാറാക്കുന്നുണ്ടായിരുന്നു. കങ്കണയെ കണ്ട് ആ കഥ പറഞ്ഞു. കഥ അവര്‍ക്ക് വളരെ ഇഷ്ടപ്പെട്ടു. അതിന് ശേഷം നിങ്ങള്‍ ഇപ്പോള്‍ എടുത്ത് കൊണ്ടിരിക്കുന്ന സിനിമയേതെന്ന് ചോദിച്ചു. ചന്ദ്രമുഖി 2 ആണെന്ന് പറഞ്ഞു. ആരാണ് ചന്ദ്രമുഖിയുടെ വേഷം ചെയ്യുന്നതെന്നും ചോദിച്ചു.
തീരുമാനിച്ചിട്ടില്ലെന്ന് മറുപടി നല്‍കി. ആ സംഭാഷണം അവസാനിച്ചു. പിന്നെ കങ്കണ തന്നെ വിളിച്ച് താന്‍ ചന്ദ്രമുഖി ചെയ്യാം എന്ന് പറഞ്ഞു. കങ്കണയുടെ ജീവിതത്തില്‍ സ്‌ക്രിപ്റ്റ് വായിക്കാതെ ഒരു സിനിമ ചെയ്തിട്ടില്ല. കഥയോ സീനോ അറിയാതെ രണ്ട് ദിവസത്തേക്ക് ഡേറ്റ് തരാന്‍ പറ്റുമോ?
അങ്ങനെയെങ്കില്‍ നിങ്ങളെ കാസ്റ്റ് ചെയ്യാമെന്ന് താന്‍ പറഞ്ഞു. രണ്ട് ദിവസം കോംബിനേഷന്‍ സീന്‍, പിന്നെ ഒരു മാസം കഴിഞ്ഞ് കോള്‍ ഷീറ്റ് മതി. കങ്കണ വന്നു. സീന്‍ പറയാതെ ഷോട്ടുകള്‍ എടുത്തു. അതിന് ശേഷമാണ് കഥ പറഞ്ഞത് എന്നാണ് സംവിധായകന്‍ പി. വാസു പറയുന്നത്.