കമല്‍ ഹാസന്റെ ജന്മദിനത്തില്‍ വമ്പന്‍ സര്‍പ്രൈസ് ഒരുങ്ങുന്നു. മണിരത്‌നം-കമല്‍ ഹാസന് കൂട്ടുകെട്ടില്‍ ഒരുങ്ങുന്ന ‘കെഎച്ച് 234’ ചിത്രത്തിന്റെ ടീസര്‍ നവംബര്‍ 7ന് കമലിന്റെ 69-ാം ജന്മദിനത്തില്‍ എത്തിയേക്കും. ടീസറിനായുള്ള പ്രൊമോ ഷൂട്ട് ആണ് ഇപ്പോള്‍ നടന്നു കൊണ്ടിരിക്കുന്നത്.
36 വര്‍ഷത്തെ ഇടവേളയ്ക്ക് ശേഷം മണിരത്‌നവും കമല്‍ ഹാസനും ഒന്നിക്കുന്ന ചിത്രമാണ് കെഎച്ച് 234. ചിത്രത്തിന്റെ പ്രമോ ഷൂട്ട് കഴിഞ്ഞ ദിവസങ്ങളില്‍ ചെന്നൈയില്‍ കമല്‍ പൂര്‍ത്തിയാക്കി എന്നാണ് റിപ്പോര്‍ട്ടുകള്‍. മൂന്ന് ദിവസമാണ് പ്രൊമോ ഷൂട്ടിനായി എടുത്തത്.
ഇതില്‍ രണ്ട് ദിവസം മാത്രമാണ് കമല്‍ ഹാസന് ചിത്രീകരണത്തിന് എത്തിയത്. ഒരു ദിവസത്തെ ഷൂട്ട് നടന്റെ ബോഡി ഡബിള്‍ വച്ചാണ് ചിത്രീകരിച്ചത് എന്നാണ് റിപ്പോര്‍ട്ട്. ഇതില്‍ ചില ആക്ഷന്‍ സീക്വന്‍സുകളും ഉള്‍പ്പെടുന്നുണ്ട്. ജോര്‍ജിയയില്‍ നിന്നുള്ള സ്റ്റന്‍ഡ്മാനാണ് താരത്തിന്റെ ബോഡി ഡബിളായി എത്തുന്നത്.
അന്‍ബറിവ് ആണ് ആക്ഷന്‍ ഡയറക്ടര്‍മാര്‍. രവി കെ ചന്ദ്രനാണ് കെഎച്ച് 235ന്റെ ഛായാഗ്രഹണം. തൃഷ, ജയം രവി, ദുല്‍ഖര്‍ സല്‍മാന്‍ എന്നിവര്‍ കെഎച്ച് 234ന്റെ ഭാഗമാകുന്നുണ്ട് എന്ന റിപ്പോര്‍ട്ടുകളും നേരത്തെ പുറത്തു വന്നിരുന്നു. അതേസമയം, ഏറെ പ്രത്യേകതകളോടെയാണ് പ്രൊമോ എത്തുക എന്നും റിപ്പോര്‍ട്ടുകളുണ്ട്.
ഒരു വിഷ്വല്‍ ട്രീറ്റാകും പ്രേക്ഷകന് ടീസര്‍ ഒരുക്കുക. ടീസറില്‍ ചിത്രത്തിന്റെ കഥയെ കുറിച്ചുള്ള ചില സൂചനകള്‍ പങ്കുവച്ചേക്കാം. എന്നാല്‍ ചിത്രത്തിലെ താരങ്ങളെ കുറിച്ചോ, ടീസറിനോ കുറിച്ചോ ഇതുവരെ ഔദ്യോഗികമായ ഒരു വിവരങ്ങളും പുറത്തുവന്നിട്ടില്ല.