ധനുഷിന്റെ പൊളിറ്റിക്കല്‍ ത്രില്ലര്‍ ചിത്രം കൊടിയില്‍ നെഗറ്റീവ് റോളിലുള്ള കഥാപാത്രമായി തൃഷ എത്തി പ്രേക്ഷക കൈയടി നേടിയിരുന്നു. ഇപ്പോള്‍ തമിഴില്‍നിന്ന് മറ്റൊരു നായിക കൂടി നെഗറ്റീവ് റോളില്‍ എത്തുകയാണ്. മുന്‍കാല നായിക സിമ്രനാണ് ശിവകാര്‍ത്തികേയന്‍ നായകനായി എത്തുന്ന ചിത്രത്തില്‍ നെഗറ്റീവ് കഥാപാത്രത്തെ അവതരിപ്പിക്കുന്നത്.
ഹിറ്റ് ചിത്രം രജനീമുരുകന്‍ സ്റ്റൈലിലുള്ള സിനിമയായിരിക്കും ഇതെന്നാണ് കഴിഞ്ഞ ദിവസം ഒരു അഭിമുഖത്തില്‍ ശിവകാര്‍ത്തികേയന്‍ പറഞ്ഞത്. സിമ്രന്‍ ഫുള്‍ ഓണ്‍ നെഗറ്റീവ് കഥാപാത്രമായി എത്തുന്നതും എസ്‌കെ വെളിപ്പെടുത്തിയത് ഈ അഭിമുഖത്തിലാണ്.
ഔദ്യോഗികമായി ടൈറ്റില്‍ പ്രഖ്യാപനം നടന്നിട്ടില്ലെങ്കിലും സീമാരാജാ എന്നാണ് ചിത്രത്തിന്റെ പേര് എന്ന് അറിയുന്നു. സാമന്തയാണ് ചിത്രത്തിലെ നായിക. സൂരി, നെപ്പോളിയന്‍ തുടങ്ങിയവരും ചിത്രത്തില്‍ നിര്‍ണായകമായ വേഷത്തില്‍ അഭിനയിക്കുന്നുണ്ട്.
Read more
എസ്‌കെ നല്‍കുന്ന വിവരങ്ങള്‍ അനുസരിച്ചാണെങ്കില്‍ ചിത്രത്തിന്റെ ഷൂട്ടിംഗ് ഏതാണ്ട് 60 ശതമാനത്തോളം പൂര്‍ത്തിയായിട്ടുണ്ട്. പൊന്റാമാണ് ചിത്രത്തിന്റെ സംവിധായകന്‍. വേലൈക്കാരന്റെ നിര്‍മ്മാതാക്കളായ 24 എഎം സ്റ്റുഡിയോസാണ് ഈ ചിത്രത്തിന്റെ നിര്‍മ്മാതാവ്.
